Шымкентте Конституция күніне орай қаланың әлеуметтік-экономикалық және мәдени дамуына үлес қосқан азаматтарға мерекелік медаль табысталды.

«Ата Заңым – айбыным» атты салтанатты шарада патриоттық әндер насихатталып, бейнеролик көрсетілді. Елдің басты мерекесін атап өтуге қоғам қайраткерлері мен зиялы қауым өкілдері, мемлекеттік қызметкерлер мен қоғамдық ұйым мүшелері қатысты.

Ел тәуелсіздігінің тірегі – Ата Заңға биыл 30 жыл толып отыр. Айрықша мерекеге арналған салтанатты шарада көк байрақ пен Конституция сахнаға шығарылып, мемлекеттік рәміздерге құрмет көрсетілді. Әскери оркестрдің сүйемелдеуімен әнұран орындалды.

Ғабит Сыздықбеков, қала әкімі:

- Президент Қасым-Жомат Тоқаевтың бастамасымен 2022 жылы елімізде ауқымды Конституциялық реформа жүргізілді. Бұл Әділетті Қазақстан құру жолындағы тарихи қадам болып табылды. Халықтың үнін еститін мемлекет қағидасы нақты іске аса бастады. Көк байрағымыз әрдайым биікте желбіреп, ынтымақтастық жолында өркен жайған мемлекетіміздің мәртебесі өсе берсін.

Шара аясында қаланың әлеуметтік-экономикалық дамуына сүбелі үлес қосқан азаматтар мерекелік медальмен марапатталды. Кәсіби міндетін адал атқарып, қоғам дамуына еңбек сіңірген қарапайым жұмысшылар мен журналистер, педагогтар мен медицина мамандары құрмет биігінен көрінді.

Шекербек Шахабаев, Қалалық №23 мектеп-лицейінің мұғалімі:

- 30 жылда мұғалімнің мәртебесі артып келе жатыр. Мектеп пен ата-ана бірге жұмыс істеп, білікті, саналы ұрпақтарды тәрбиелеп жатырмыз.

Ата Заң елдің тұрақты дамуы мен бірлігінің берік негізі. Жиынға қатысушылар Конституцияның әділдік пен тәртіпті, азаматтардың құқығы мен бостандығын қорғаудағы маңызы туралы ой қозға.

Бұхарбай Парманов, Қалалық қоғамдық кеңестің төрағасы:

- Экономика дамығаннан кейін Қазақстан халқының әлеуеті, жағдайы, білім алуына осы Ата Заң үлкен үлесін қосты.

Мерекелік салтанатты шара «Ата Заңым – айбыным» деген атаумен өтті. Тақырып аясында бейнеролик көрсетіліп, патриоттық әндер орындалды.

Нұрсұлтан Мұхамеджан, Нұрмахан Бекмұратов, Нұрмахан Мұсатов, 24KZ