Қостанай облысының Перцев ауылындағы қоқыс өңдеу зауыты жаңғыртылып жатыр.

Күрделі жөндеуге «Жасыл даму» және «Өнеркәсіпті дамыту қоры» 354 млн теңге бөлді. Зауытта техникалық резеңке қалдығы қайта өңделіп, пиролиз отыны мен резеңке үгіндісі шығарылады. Бүгінде кәсіпорын жылына 3 мың тонна өнім дайындап отыр. Жаңғыртудан кейін өндірістік қуаттылық 4 есе артады-дейді мамандар. Яғни ескі резеңкелер кәдеге жарайды. Елде қоқыс өңдейтін өндіріс орындарын салуға «Жасыл даму» акционерлік қоғамы қолдау көрсетуге дайын. Жылына 3 пайыздық мөлшерлемемен 15 жылға несие ұсынады. Қазіргі таңда ел бойынша 67 жоба мақұлданған. Соның 43-і қалдықты қайта өңдеуге қатысты жобалар.

Ринат Ишбулатов, кәсіпорын басшысы:

- «Жасыл даму» қорынан алған ақшаға құрал-жабдықтар сатып алдық. Жаңа цех осы алаңда орналасады. Қазан, қараша айларында құрал-жабдықтарды орнату, құрастыру жұмыстары басталады. Қазір біз «Эко-қолдау» жобасына қатысамыз. Резеңке қалдықтарын қайта өңдегеніміз үшін субсидия төленеді. Экология саласында жұмыс істейтін кәсіпорындар үшін мемлекет тарапынан жасалып отырған бұл — үлкен қолдау, ынталандыру деп білемін.