Қазақстан «Тургунди-Герат» теміржолының құрылысына инвестиция салады. Жақында тиісті меморандумға қол қойылады. Олжас Бектенов Экономикалық ынтымақтастық ұйымының XVII саммиті аясында Ауғанстан премьер-министрінің орынбасары Абдул Гани Барадармен екіжақты кездесу өткізіп, ел Үкіметінің осы жобаны іске асыруға ниетін растады.

Бұдан бөлек, кездесуде сауда-экономикалық, көліктік-логистикалық, аграрлық салалардағы ынтымақтастықты дамыту мәселелері талқыланды. Ал Ханкенді қаласында өткен Экономикалық ынтымақтастық ұйымының XVII саммиті барысында ұйымға қатысушы мемлекеттер арасындағы экономикалық ынтымақтастық мәселелері қаралды. Көлік және логистика, энергетика, климаттық қауіпсіздік, цифрлық трансформация және тағы басқа салалардағы өзара іс-қимылға назар аударылды.