Бұл бағытта бюрократияға жол берілмеуі тиіс.

Премьер-министр Олжас Бектенов өңір әкімдіктеріне жылумен қамтамасыз ету нысандарын жөндеу жұмыстарын тамыз айының соңынан кешіктірмей аяқтауды тапсырды, деп хабарлайды inbusiness.kz сайты.

"Бүгінде Үкімет резервінен 25 млрд теңгеден астам қаржы бөлу туралы шешім мақұлданды. Аталған қаражат Жетісу, Абай, Ақмола және Шығыс Қазақстан облыстарында жылу көздерін жөндеу мен салуға, сондай-ақ төрт өңірде 30 шақырымға жуық жылу желілерін жөндеуге бағытталды. Осы қаражаттың тиімді жұмсалуын және қол жеткізілген нәтижелерді бақылауда ұстау қажет. Қазірдің өзінде кейбір өңірлерде жұмыстардың созылып кету қаупі туындап отыр. Егер күзде өңірлерде энергия нысандарының дайындық паспорттарын алмайтын жағдайлар тіркелетін болса, онда өңір әкімдері тікелей жауап береді", – деді Премьер-министр.

Олжас Бектенов өңір әкімдіктеріне екі апта мерзімде барлық конкурстық рәсімдерді өткізіп, жөндеу жұмыстарына нақты кірісуді тапсырды. Айтуынша, ешқандай басы артық бюрократия болмауы керек.

"Жылумен қамтамасыз ету нысандарын жөндеу жұмыстарын тамыз айының соңынан кешіктірмей аяқтау қажет. Өнеркәсіп және құрылыс министрлігі, өңір әкімдіктері 1 қыркүйекке дейін білім беру және денсаулық сақтау нысандарының толығымен дайын болуын қамтамасыз етсін. Солтүстік, орталық және шығыс өңірлерде барлық инженерлік инфрақұрылым мен тұрғын үй-коммуналдық шаруашылық нысандары 15 қыркүйекке дейін, ал қалған өңірлерде – 15 қазанға дейін толық әзір болуға тиіс. Әкімдерге жылу нысандарына тұрақты негізде барып, жағдайды жеке бақылауға алуды тапсырамын", – деп атап өтті ол.

Бұдан бөлек "KEGOC" компаниясы Энергетика министрлігімен бірлесіп, 25 мамырға дейін ұлттық маңызы бар станцияларға арналған жабдықтардың жұмыс режимдерін бекітуі тиіс.

Ал 1 қыркүйекке дейін жылу көздері мен теміржол тұйықтарында отын қорын алдын ала жинақталуы қажет.

Айта кету керек, бұған дейін Семей мен Өскемендегі ЖЭО-ларды салатын консорциум жайлы жазғанбыз. Елде электр энергиясын өндіру көлемі өсті.