Су ресурстарын тиімді басқару үшін арнайы өңірлік штабтар құрылады. Премьер-министр Олжас Бектенов егіс алқаптарын суару кезеңіне арналған кеңесте осындай тапсырма берді. Жаңа орталық су жеткізушілер мен шаруалардың жұмысын үйлестіріп, үнемдеу технологияларын кеңінен қолдануға көмектеседі. Жиында елдегі, әсіресе су тұтынудың 97 пайызына ие оңтүстік өңірлердегі су жағдайы талқыланды. Шу, Талас және Сырдария өзендеріндегі жағдай, суды әділ бөлу мәселелеріне назар аударылып, министрлік, аймақ басшыларының баяндамалары тыңдалды. Сондай-ақ ылғалды аз қажет ететін дақылдарға көшу, су үнемдеу технологияларын енгізу бойынша ауыл шаруашылығында қабылданып жатқан шаралар қаралды. Бүгінде «ҚазСуШар» шаруаларға су жеткізу бойынша 22 мыңнан астам келісімшарт жасасқан.

Нұржан Нұржігітов, ҚР Су ресурстары және ирригация министрі:

Жалпы, республика бойынша 12 млрд текше метр су жинау жоспарланған. Оның 97%-ы 1,2 млн гектар ауыл шаруашылық алқабын суару үшін оңтүстік өңірлерге қажет. Соның ішінде «ҚазСуШар-дың» биылғы алдын ала жоспарына сай, суару мақсатына арналған 8,8 млрд текше метр судың 3,9 млрд текше метрі жиналды. Бұл вегетациялық кезеңге арналған жоспардың 44 пайызын құрайды. Кезең аяқталғанға дейін тағы 4,9 млрд текше метр суды жеткізу қажет.

Ернұр Медет