Иран билігі әлем қауымдастығына қатаң ескерту жасады, деп хабарлайды inbusiness.kz сайты BILD басылымына сілтеме жасап.

Иран Парламентінің депутаты әрі Ұлттық қауіпсіздік және сыртқы саясат комитетінің төрағасы Эбрахим Азизи Парсы шығанағындағы елдерді Ормуз бұғазындағы кеме қатынасын қамтамасыз етуге бағытталған БҰҰ қарарын қолдамауға шақырды.

"Біз барлық үкіметтерге, соның ішінде Бахрейн секілді шағын мемлекеттерге де ескерту жасаймыз: АҚШ ұсынып отырған қарарды қолдау ауыр салдарға әкелуі мүмкін. Ормуз бұғазы – әлемдік тасымалдың күретамыры. Оны өздеріңіз үшін мәңгіге жауып алмаңыздар", – деп жазды X әлеуметтік желісінде:

Ал Дональд Трамп Иранмен қақтығысты тоқтатуға қатысты ұстанымын өзгерте бастағандай. Қазір Вашингтон үшін басты мәселе – Ормуз бұғазы арқылы кеме қозғалысын қайта жандандыру. Ал Тегеранның ядролық және зымыран бағдарламасына қатысты күрделі келіссөздерді кейінге қалдыруға дайын екені байқалады.

Трамп бірнеше рет Иранның ядролық бағдарламасын жою Таяу Шығыстағы қақтығыстың негізгі себебі екенін айтқанымен, мұнай мен газ жеткізудегі стратегиялық маңызына байланысты Ормуз бұғазын қайта ашу мәселесі анағұрлым өзекті сипатқа ие болды. Бұл – Тегеранның дипломатиялық келіссөздердегі басты қысым тетіктерінің бірі.

Blackstone Compliance Services консалтингтік компаниясының директоры Давид Танненбаум:

"Трамп әкімшілігі қазір бұл соғыстан қалай да шығудың жолын іздеп отыр. Олардың басты мақсаты – бұғаз арқылы қауіпсіз кеме қатынасын қайта қамтамасыз ету. Тіпті Иранның ядролық бағдарламасы күн тәртібінде әлі де маңызды мәселе болып тұр ма деген күмән туындайды", – деді.

Энергия тасымалдаушылары бағасының күрт өсуі аясында АҚШ мемлекеттік хатшысы Марко Рубио Вашингтон алдымен Ормуз бұғазындағы кеме қозғалысының қауіпсіздігін қалпына келтіріп, содан кейін ғана келіссөздерге қайта оралуды жоспарлап отырғанын мәлімдеді.