Магистральдық газ құбырлары бойындағы күзет аймағына ішкері еніп құрылыс жүргізу немесе рұқсат етілмеген жұмыстарды атқару адам өмірі үшін аса қауіпті. Мұндай әрекеттер апатты жағдай тудырып, газ тасымалдау ісіне кедергі келтіреді. «Интергаз Орталық Азия» АҚ өкілдері ұйымдастырған баспасөз туры барысында газ желісі бойындағы күзет аймақтарының маңыздылығына назар аударылды.

Газли-Шымкент және Ташкент-Бішкек-Алматы деп аталатын екі бірдей магистральдық газ желісі Түркістан облысы мен Шымкент қаласының аумағын басып өтеді. Оның ұзындығы 676 шақырым. Қауіпсіздік мақсатында құбырлардың екі шетінен 50 метр жер күзет аймағы болып белгіленген. Ал компрессорлық және газ тарату станциялары төңірегінде 100 метрге дейін тұйықталған сызықпен шектелген. Яғни бұл аймақтарға ағаш егуге, топырақты 35 сантиметрден әрі жыртуға және суаруға болмайды.

Сәкен Исмайылов, «Интергаз Орталық Азия» АҚ Шымкент магистральдық газ құбырлары басқармасының директоры:

Ең аз рұқсат етілген қашықтық газ құбырларының диаметрі мен оның санатына байланысты 700 метрді құрайды. Осы аралықта ешқандай құрылыс нысандарын, газ құбырларына қатысы жоқ құрылыс нысандарын салуға болмайды.

Өңір аумағынан өтетін газ құбырларының көп бөлігі жер астына көмілген. Күзет аймағы ақпараттық бағаналармен белгіленіп, қасына шақырымдық бағаналар орнатылған. Олардың барлығы анық көрінуі үшін үшін ашық түстермен боялған. Мұндай шектеулер өрт және жарылысқа әкеп соқтыратын физикалық әсерден қорғау үшін әдейі жасалған.

Жандос Сәденов, «Интергаз Орталық Азия» АҚ Шымкент магистральдық газ құбырлары басқармасының бас инженері:

Егер заң бұзушылықтар немесе тыйым салынған жұмыстар анықталса, ескертулер береміз. Ескерту бойынша жер иеленуші немесе заңбұзушылықты жүзеге асырған кісілер бізбен келісу қағаздарын алу бойынша жұмыстар жүргізеді.

Қауіпсіздік ережелеріне бағынбау, күзет аймағының талаптарын бұзу көгілдір отын тасымалын мүлдем тоқтатып тастауы мүмкін. Сондықтан белгіленген арақашықты сақтау тұрғындардың өмірі мен олардың мүліктерін қорғау үшін қажет.

Ғани Қалмаханов