Тұрғынның пәтерінен 128 слоттық симбокс, 115 SIM-карта және ондаған ұялы телефон тәркіленді.

Павлодарда "Айқын Нәтиже" іс-шаралар жоспары аясында прокуратура қызметкерлері полициямен бірлесіп, алаяқтық схемаларда пайдаланылған арнайы жабдықты заңсыз қолдану фактісін анықтады, деп хабарлайды inbusiness.kz сайты.

Көпқабатты үйлерді аралау барысында бір тұрғынның пәтерінен 128 слоттық симбокс, "Tele2" және "Алтел" операторларының 115 SIM-картасы, екі роутер және 32 ұялы телефон табылған.

Аталған дерек бойынша Қазақстан Республикасы Қылмыстық кодексінің 213-бабының 2-бөлігі бойынша сотқа дейінгі тергеп-тексеру басталды. Тергеу абоненттік құрылғылардың сәйкестендіру деректерін өзгертуге мүмкіндік беретін бағдарламаларды заңсыз пайдалану және тарату фактісі бойынша жүргізілуде.

Қазіргі уақытта істің барлық мән-жайын және ықтимал сыбайластарды анықтауға бағытталған тергеу шаралары жалғасып жатыр. Күдіктіге қатысты үйқамақ түріндегі бұлтартпау шарасы қолданылды.