Полиция қызметкерлері 104 қылмыстық істі аяқтап, оның 94-ін сотқа жолдады. Сонымен қатар 37 эпизодтан тұратын көпэпизодты қылмыстық іс те сот қарауына жіберілді.

2025 жылдан бастап киберқылмыстардың алдын алу мақсатында Жетісу облысының прокуратурасы, Полиция департаменті, «Қазақтелеком», «Қайнар-Медиа» ЖШС және «Мобайл Телеком-Сервис» ЖШС арасында үш ынтымақтастық туралы меморандумға қол қойылды.

Негізгі мақсат — интернет-қылмыстардың алдын алу, анықтау және жолын кесу, сондай-ақ тұрғындардың цифрлық сауаттылығын арттыру.

Профилактикалық жұмыстарға «Жасқыран» студенттік жасағының мүшелері, «Lider KZ» еріктілері, «ҚосҚанатЖетісу» қоғамдық бірлестігі мен блогерлер белсенді түрде тартылып келеді.

Тұрғындарға арналған ескерту сипатындағы бейнематериалдарға апаратын QR-кодтары бар арнайы жадынамалар әзірленді. Қоғамдық орындарда 58 мыңға жуық жадынама мен брошюра таратылды.

Интернет кеңістігін мониторингтеу барысында 1000-ға жуық алаяқтық сайт анықталып, бұғатталды. Сонымен қатар жыл басынан бері киберполиция қызметкерлері 10 адамнан тұратын екі дропперлер тобын ұстады. Сотқа сегіз қылмыстық іс жолданды.

«Интернет-алаяқтар азаматтарды алдаудың тәсілдерін үнемі өзгертіп отырады. Сондықтан біздің басты міндетіміз — мұндай қылмыстарды ашумен қатар, олардың алдын алу. Бүгінде профилактикаға, тұрғындардың цифрлық сауаттылығын арттыруға және алаяқтық схемаларды жедел анықтауға ерекше көңіл бөлінуде. Азаматтарды сақ болуға, жеке деректері мен банк реквизиттерін бөгде адамдарға бермеуге шақырамыз», деп атап өтті киберполиция қызметкерлері.

Полиция Жетісу облысының тұрғындарын цифрлық қауіпсіздік талаптарын сақтауға және жеке әрі банктік мәліметтерін бөгде адамдарға бермеуге шақырады.

Айта кетейік, Мәдениет және ақпарат министрлігі мүдделі мемлекеттік органдармен бірлесіп жазғы кезеңде балалардың қауіпсіздігін арттыру бойынша 59 пункттен тұратын арнайы медиа жоспар әзірледі.