Астанада халықаралық сайқымазақтар фестивалі өтті. Қазақстан мен Еуропа елдерінің театр және цирк әртістері балалар мерекесін шерумен айшықтай түсті. Сонымен қатар фестиваль аясында қайырымдылық гала-концерті ұйымдастырылды.

Фестиваль «Бәйтерек» монументі маңында шымылдығын түрді. Оған қазақстандық әйгілі әртістер Мұтырғановтар отбасы, ресейлік «Лицедеи» театрының ұжымы, испаниялық сайқымазақ кіші-Уго Санчес, италиялық Дэнни мен Диво дуэті, бельгиялық Барто және басқа да өнерпаздар келді.

Ділназ Ертаева, фестивальге қатысушы:

- Өте керемет бағдарлама болып жатыр. Неше түрлі клоундар, басқа да анимациялық бағдарламалар, неше түрлі шоу. Мына жақта өте көп адам жүр. Балалар да, әрине, өте көп. Барлығы фотоға түсіп, барлығының көңіл күйі өте әдемі және мерекені тойлап жатыр.

Митяй, фестивальге қатысушы:

- Қазақстандық балаларды мерекемен құттықтаймын! Мен Санкт-Петербург қаласынан келдім. Балалардың көңіл күйін көтеру үшін «Лицедеи» театрының әртістері арнайы келді. Фестиваль өте көңілді өтіп жатыр.

Көңілді кейіпкерлер, түрлі-түсті шарлар мен әсем әуендер. Фестиваль шеңберіндегі сайқымазақтар шеруін дәл осылай бейнелеуге болады. Әртістер қала тұрғындарымен бірге «Бәйтерек» монументінен «Ғашықтар» саябағына дейін жүріп өтті.

Азамат Ерғалиев, қала тұрғыны:

- Балалар мерекесімен құттықтаймын! Бәрінің дені сау болсын, отбасымыз аман болсын! Осындай шара ұйымдастырып жатқанына ұжымға рақмет. Керемет, бәрі күшті.

Ауқымды фестиваль екінші жыл қатарынан өтіп отыр. «Мұндай бастама мереке сәнін келтіріп қана қоймай, халықаралық мәдени байланысты да нығайтуға септігін тигізеді», – дейді қатысушылар.

Авторлары: Еркебұлан Смадияров