Ерекше шоу президент Дональд Трамптың 14 маусымдағы 80 жылдық мерейтойына және АҚШ-тың 250 жылдығына орай ұйымдастырылмақ.

АҚШ-та Ақ үйдің оңтүстік көгалында өтетін UFC турниріне байланысты үлкен қызығушылық туындады, деп жазады inbusiness.kz сайты "Қазақпарат" агенттігіне сілтеме жасап.

Трамп билеттердің басым бөлігін таратуды жеке өзі бақылауда ұстап отыр, ал ең үздік орындар үшін демеушілер 1 миллион доллардан астам қаржы төлеуге дайын.

Алда өтетін турнирді Трамп президенттігіндегі ең шулы оқиғалардың бірі деп аталып жатыр. NBC News мәліметінше, билеттерге сұраныс өте жоғары болған. Шақырту алуға қатысты өтініштер күн сайын әкімшілік қызметкерлеріне, президент отбасы мүшелеріне және UFC басшылығына түсіп жатыр.

Ауқымды шоу Ақ үйдің оңтүстік көгалында өтеді және АҚШ-тың 250 жылдығы мен Трамптың туған күніне арналған мерекелік іс-шаралардың бір бөлігі болмақ. 14 маусымда ол 80 жасқа толады.

Ұйымдастырушылар октагон маңына шамамен 4 мың көрерменді орналастыруды жоспарлап отыр. Сонымен қатар билеттердің едәуір бөлігін президент әскери қызметкерлерге, саяси одақтастарына, әкімшілік өкілдеріне, кәсіпкерлер мен шетелдік қонақтарға жеке өзі таратып жатыр.

Ресми түрде турнирге кіру тегін болады, алайда ринг маңындағы орындарға қол жеткізу қымбат демеушілік пакеттермен байланысты. Дереккөздердің мәліметінше, кейбір ұсыныстардың құны 1 миллион доллардан асып кеткен, ал жекелеген пакеттер 1,5 миллион долларға бағаланған.

Дана Уайт күн сайын билеттерге көмектесу туралы өтініштер алып жатқанын мойындады. Оның айтуынша, UFC қарамағында небәрі 200 орын ғана бар, ал шақыртулардың негізгі бөлігін Ақ үй бақылап отыр.

Турнир үшін алып 90 футтық конструкциясы мен сегіз бұрышты рингі бар арнайы арена салынып жатыр. Сахна элементтері Пенсильвания штатында құрастырылып, кейін Вашингтонға жеткізіледі.

Ақ үй аумағындағы көрермендерден бөлек, ұйымдастырушылар президент резиденциясының оңтүстігіндегі Эллипс алаңында 85 мың адамға дейін қабылдауды жоспарлап отыр. Бұл жерде жекпе-жектер алып экрандар арқылы көрсетіледі. Онлайн трансляцияны Paramount+ платформасы ұсынады.

Еске салсақ, Трамп UFC жекпе-жегінің Ақ үйде өтетін күнін өткен жылдың қазан айында жариялады. АҚШ президенті UFC басшысын өзінің жақын досы санайды және бұл спорт түрінің жанкүйерлерін өзінің саяси электораты қатарына жатқызады.