Павлодар облысының әкімі Асайын Байхановтың әпкесі сот алдында жауап бергені туралы ақпарат тарады, — деп хабарлайды Massaget.kz тілшісі.

Мән-жайы

Бұған дейін желіде өңір басшысының туысын полиция қызметкерлері тоқтатқаны, оның жеңіл дәрежеде мас болғаны туралы ақпарат тарады. Кейін "Сот кабинетінде" әкімнің әпкесі, расында да, әкімшілік жауапкершілікке тартылғаны туралы дерек пайда болды.

Сот Б.-ны ӘҚБтК-нің 608-бабы 1-бөлігі ("Көлік құралын мас күйде басқару") бойынша кінәлі деп тауып, оған 15 тәулік әкімшілік қамау және 7 жыл мерзімге жүргізуші куәлігінен айыру жазасын тағайындаған. Сот қаулысы 10 қарашада шыққан.

Әкімнің өзі не дейді?

Өңір әкімі Асайын Байханов әлеуметтік желідегі парақшасында осы жағдайға пікір білдірді.

"Үлкен әпкемнің әкімшілік жауапкершілікке тартылуына қатысты мынаны айта аламын: барлық азамат заң алдында тең. Менің әпкем де, отбасымыздың басқа мүшелері сияқты бұл қағидаттан тыс емес", — деді әкім Threads желісінде.

Аптаның басты оқиғалары мен пайдалы видеоларды көру үшін YouTube арнамызға жазылыңыз