Қатаң тәртіппен жүретін әскери өмірде де шығармашылыққа орын бар. Мұның жарқын үлгісі – 5573 әскери бөлімінің сарбазы қатардағы Айдын Рахымов. Ол әскери қызметін өтей жүріп, мультфильм арқылы патриотизм мен достықты насихаттап жүр, деп жазады Egemen.kz.

Айдын үшін анимация – тек хобби емес, патриоттық сезім мен рухани құндылықты дәріптейтін құрал. Қаруластары оның жобаларына атсалысып, кейіпкерлерді дыбыстауға, идея ұсынуға көмектеседі. Ал командирлері сарбаздың шығармашылығын қолдап, мұндай бастамалар әскери рухты көтеріп, ұжымның бірлігін арттыратынын атап өтті.

«Мультфильмді жасағанда мен визуалды бөлігіне барынша мән беруге тырыстым, анимация мен монтаждың заманауи бағдарламаларын қолдандым. Бұл жұмысқа көркемдік, шынайылық және заманауи сипат беруге мүмкіндік берді. Дегенмен әлі де жетілдіре түскім келетін тұстар бар», деді Айдын.

Қызмет пен шығармашылықты қатар алып жүру оңай емес. Дегенмен Айдын бұл тепе-теңдікті сақтай біледі. Сөзінше, әскердегі міндет әрқашан бірінші орында, бірақ бос уақыт табыла қалса, ол шығармашылыққа көңіл бөлуге тырысады.