Орман шаруашылығы қызметкерлерінің кәсіби мерекесі қарсаңында Экология және табиғи ресурстар министрлігі мекемеге 34 заманауи өрт сөндіруші көлік табыстады.

Жаңа техника жалынды дер кезінде сөндіріп, орман қорын сақтауға мүмкіндік береді — дейді мамандар.

«Ертіс орманы» резерватының жалпы аумағы 270 мың гектар. Ну орман, қалың шөп, соқпақтар, адам аяғы баспаған жерлер мыңдаған шақырымға созылып жатыр. Өрт қауіпсіздігі қорықты бойлай орнатылған бейнекамералар арқылы бақыланады. Жалынды дер кезінде сөндіру үшін жаңа техниканың маңызы зор. Экология және табиғи ресурстар министрі Ерлан Нысанбаевтың айтуынша, елдегі бүкіл табиғи резерваттардың құрал-жабдықтары жаңартылып жатыр.

Ерлан Нысанбаев, ҚР Экология және табиғи ресурстар министрі:

- Бүгін міне, соның бір көрінісі «Ертіс орманы» резерватына 34 өрт сөндіретін көлік әкеліп тапсырып жатырмыз. 2023 жылдан бері жалпы саны осы. 2000-ның шамасында техника беріледі. Осында тыс біз 1800 дана әртүрлі соқа, культиватор, тырмалайтын инструменттер, соның бәрін 2,5 жылдың ішінде алып береміз. Бұның бәрі 11 өңірдегі нормативті қажеттілікті жабады.

«Ертіс орманы» шаруашылығында жарты ғасыр еңбек еткен Жаңбырбай Тілеубердин жаңа техниканың қадірін жақсы біледі. Айтуынша бұл көліктердің бұрынғыларға қарағанда артықшылығы мол. Цистерналарының сиымдылығы үлкен, насостарының қуаттылығы жоғары, жолсыз тұстардан да өте береді. Жалын шарпыса автоматты түрде өшіреді.

Жаңбырбай Тілеубердин, Бейімбет орман шаруашылығының көлік жүргізушісі:

- Заманауи жаңа техника беріп жатыр, ризамыз. Бұрынғы көліктеріміз ескі, қирай беретін. Алдағы уақытта тек дөңгелегі жарылмай, көлік қирамай, орманымызды қорғап жүрсек болғаны.

Кәсіби мереке қарсаңында табиғи резерваттың еңбек озаттары төсбелгілермен марапатталып, Алғыс хаттарға ие болды.

Авторлары: Валентина Леонова, Даулет Кошкарбаев