Биыл Ұлытау облысына «Оңтүстіктен – Солтүстікке» бағдарламасымен 28 отбасы қоныс аударады, деп хабарлайды 24kz.

Бұл мақсатқа облыс қазынасынан 100 млн теңгеден астам қаржы бөлінді.

Қазір жауаптылар оңтүстік өңірлерді аралап, үгіт-насихат жүргізіп жүр. Мансап орталығы мамандарының айтуынша, көшіп келген отбасылар негізінен халық саны аз ауылдарға қоныстанады.

Былтыр Ұлытау ауданына «Оңтүстіктен – Солтүстікке» ішкі көші-қон жобасы бойынша 11 отбасы көшіп келді. Көпбалалы ана Жансая Ысқақова сол ағайынның алдыңғы легімен келген. Қазір аудан орталығындағы балабақшада тәрбиеші болып жұмыс істейді. Жобаның шарты бойынша отбасыға толық көлемде қолдау көрсетілді.

Жансая Ысқақова, Ұлытау ауылының тұрғыны:

- Жұмысқа орналастырды. Балаларымның бәрін мектепке орналастырды. Өзіме лайықты шағын үй алдым. Ұлытау ауылы жақсы, әулиелі жер дейді ғой. Бұл жаққа келгелі жақсы боп жатырмыз.

Оңтүстік өңірден келген отбасылар негізінен мал өсіруге және бау-бақша шаруашылығымен айналысуға ниетті. Сондықтан олар ауылдық елді мекендерге қоныстандырылып, жер телімі конкурссыз беріледі. Кіретін дайын үй болмаса, бір жылға әкімдік есебінен пәтер жалдап береді.

Баянқұл Аманжолов, Ұлытау аудандық Мансап орталығының басшысы:

- Биылғы жоспар 18 отбасының 75 мүшесін ауданға әкелуді жоспарлап отырмыз. Оған қаражат қарастырылған. 7 сәуір мен 10 сәуір аралығында оңтүстік Қазақстан, яғни, Түркістан облысына барып қайтқанбыз. Ол жақта үгіт-насихат жұмыстарын жүргіздік. Қазіргі таңда 7-8 отбасы тіркеліп отыр. Олардың барлығы 25 мамырдан кейін балалардың сабағы біткен соң келеміз деп жоспарлап отыр.

«Жобаға қатысуға тілек білдірушілер көп», — дейді облыстық еңбек мобильділігі орталығы. Биыл өңірге 120 дан астам адамды көшіріп әкелу жоспарланып отыр. Оларға бір реттік қаржылай көмек көрсету мен баспана сатып алуға 103 млн теңге бөлінді. Қазір өтініштер сұрыпталып жатыр. Әрине, таңдау барысында көпбалалы отбасыға және дәрігер, мұғалім секілді өңірде тапшы мамандық иелеріне басымдық беріледі.

Авторлары: Елдос Кәкенов, Нұрдәулет Аманкешов, Гүлшаһира Серекбаева