Биыл Қарағанды облысында 15 мың оқушы мектеп табалдырығын аттайды. Ал өңірдегі мектеп тапшылығы мәселесі бірте-бірте шешімін тауып келеді. «Келешек мектептері» ұлттық жобасы аясында биыл 10 білім ордасын салу жоспарланған .

Қарағанды қаласындағы Гүлдер шағын ауданында 300 балаға шақталған жаңа мектеп бой көтерді. Бұған дейін Ыбырай Алтынсарин атындағы үш ауысымдық мектепте оқып келген біраз бала қыркүйектен бастап осында ауысады. Жаңа нысанда бірнеше спорт залы, кітапхана, зертханамен жабдықталған оқу бөлмелері, асханасы бар. Дәл осындай мектеп жыл басында «Томирис» жаңа шағын ауданында да ашылды.

Гүлдана Әбішева, қала тұрғыны:

Бұған дейін балаларымыз Бауыржан Момышұлы атындағы мектепте оқыған болатын. Ол жақта сыныптар толық болғандықтан осы мектеп ашылғалы ерекше қуанышқа бөлендік. Мектептің жағдайы жасалған толығымен. Бастауыш, орта, жоғарғы сыныптар әр блокта оқиды.

«Келешек мектептері» ұлттық жобасымен салынған 1200 орындық білім ошағына өзге мектептен 500 оқушы ауысып келді. Қазір балалар үшін барлық жағдай жасалған.

Алтынгүл Володяқызы, №24 жалпы орта білім беру мектебі директорының тәрбие ісі жөніндегі орынбасары:

Бір ауысымда оқытылады. Таза қазақ тілінде. Бұл мектептің бір ерекшелігі – жаңа заманауи кабинеттердің баршылығы. STEM зертханасы, робототехника кабинеті, хореография, жиын залдары бар. Біздің ерекше мектептің артықшылығы – үйірмелердің көптігі. Балалар сыртқа шықпай, іштегі үйірмелерге тегін, емін-еркін бара алады.

Жаңа оқу жылы қарсаңында жайлы мектепте қазір қарбалас. Ұстаздар қауымы оқушыларды тіркеп, кітап үлестірілуде. Биыл орын тапшылығы жоқ, бірақ бұл ауданға келешекте тағы білім ошағы керек, — дейді мамандар.

Есентай Әшім, қалалық білім бөлімінің басшысы:

Мына шахталар болған аудандарда құрылыс аз да, қаланың оңтүстік-шығысына қарай биік үйлер салынуда. Ол биік үйлерге орналасып жатқан көбіне жас отбасылар. Бала саны көп. Сондықтан біз Қарағандының осы оңтүстік-шығыс жағында өте үлкен қажеттілікті байқаймыз. Жаңа аудандарға мектептер, балабақшалар керек. Сондықтан осы «Келешек мектептерінің» орналасу локациясының өзі осы мәселені шешіп жатыр.

Қалада тағы бір мектептің құрылысы басталды. Жоспар бойынша жаңа мектеп келесі жылы дайын болады.

Жандос Бақытұлы, тілші:

Өңірде ұлттық жоба арқылы 10 мектеп салу жоспарланған. Қазіргі таңда тең жартысы аяқталып, қолданысқа берілмек. 4 мектеп Қарағанды қаласында, 1 мектеп Балқаш қаласында ашылмақ. Қалған құрылыс жұмыстары уақытылы аяқталса, аймақтағы мектеп тапшылығы реттеледі, — дейді мамандар.

Жандос Бақытұлы