Жарысқа Қазақстан, Австрия, Жапония, Әзербайжан және Сауд Арабиясынан қатысушылар келді.

Көкшетауда Қазақстан Республикасы Оқу-ағарту министрлігі жанындағы "Talap" коммерциялық емес акционерлік қоғамының ұйымдастыруымен Цифрландыру және жасанды интеллект жылына арналған халықаралық DOSTI Skills Kokshetau 2026 чемпионаты басталды, деп хабарлайды inbusiness.kz сайты.

Ауқымды дода техникалық және кәсіптік білім беру саласының өкілдерін, халықаралық сарапшылар мен жас мамандарды бір алаңға жинады.

Биыл чемпионатқа Қазақстанмен қатар Австрия, Жапония, Әзербайжан және Сауд Арабиясынан қатысушылар келді. Олар "Электроника", "Автономды мобильді робототехника", "Прототиптеу" және "Ұшқышсыз ұшу аппараттары жүйелері" құзыреттіліктері бойынша сынға түсуде.

Чемпионат тәжірибеге негізделген форматымен ерекшеленеді. Он күн бойы Көкшетау қаласындағы Жоғары техникалық колледж базасында қатысушылар нақты өндірістік жағдайларға барынша жақын инженерлік тапсырмаларды орындайды. Бұл олардың теориялық білімін тәжірибемен ұштастырып, кәсіби дағдыларын жетілдіруге мүмкіндік береді.

Ұйымдастырушылардың айтуынша, чемпионаттың басты мақсаты – техникалық және кәсіптік білім беру жүйесіндегі мамандар даярлау сапасын арттыру, халықаралық ынтымақтастықты нығайту және индустрияға қажетті заманауи кадрларды даярлау.

Бағдарлама аясында шеберлік сабақтары, тренингтер, воркшоптар мен халықаралық сарапшылардың дәрістері ұйымдастырылады.

Сонымен қатар жарыс барысында WorldSkills Shanghai 2026 әлем чемпионатына дайындық мақсатында халықаралық жаттығу алаңы жұмыс істейді. Бұл қатысушыларға әлемдік деңгейдегі талаптарға бейімделіп, кәсіби шеберлігін арттыруға мүмкіндік береді.