Биыл Шымкент халқы түгел таза ауызсумен қамтылады.

Энергетика және инфрақұрылымды дамыту басқармасының мәліметінше, қала іргесіндегі 4 шағын ауданға магистралды құбыр тарту аяқталса, 25 мың адам сапалы тіршілік нәрін тұтынатын болады. Осы мақсатта Текесу тұрғын алабын орталық жүйеге қосу жұмыстары аяқталған.

Ерлан Қойшиевтың үйі орталықтандырылған ауызсу жүйесіне қосылды. Бұған дейін тіршілік нәрін тасып ішіп келген тұрғындарға енді таза әрі сапалы су үздіксіз жеткізіледі. Жалпы бұл өзгеріс Текесудегі 130 отбасының тұрмыс жағдайын жақсартуға сеп болды.

Ерлан Қойшиев, қала тұрғыны:

- Қазіргі судың сапасы өте жақсы. Бұрынғы су тұз, кермегі бар еді. Құм бар еді. Қазір су жақсы келіп жатыр. Тынық. Сусыз тіршілік жоқ қой. Су болғаннан кейін бәрі қуанып жатыр. Халықтың бәрі риза. Алғысын айтып отыр.

Текесу тұрғын алабына ішкі орамдық құбыр үш жыл бұрын тартылған. Алайда ұңғымадан шыққан судың сапасы нашарлап, тұтынуға жарамсыз деп танылды. Осыдан кейін бизнестің әлеуметтік жауапкершілігі аясында қолдау көрсетіліп, желі орталық жүйеге қосылды.

Бағдат Байболов, қалалық «Су құбыры және канализация басқармасы» МКК басшысы:

- 14 шақырымға жететін су құбыры салынды. Диаметрі 110 мм тарттық. Жұлдыз жақтан «насос» стансасын қойдық. Суды жаппай пайдалану кезінде жазғы уақытта проблема болуы мүмкін. Оны алдын алу үшін биыл су сақтағыш резервуарлар соғуды өз есебімізден жүргіземіз.

Былтыр қала іргесіндегі шағын аудандарға су жүйесін тарту үшін бюджеттен 2 млрд теңге бөлінді. Нәтижесінде 27 мыңға жуық тұрғынға тіршілік нәрі жеткізіліп, қала халқының 99,5% ауызсумен қамтылды.

Азат Қайнарұлы, қалалық Энергетика және инфрақұрылымды дамыту басқармасы басшысының орынбасары:

- 4 шағын ауданның құрылысын биылғы жылдың соңына дейін аяқтау күтілуде. Ақжайық, Қызылжар, Тұран мен Қайтпас-1 арасы және Құрсай елді мекендері нәтижесінде 25 мыңнан астам халық ауыз су жүйесіне қосылуға мүмкіндік алады.

Биыл бұл жұмыстар аяқталса қала халқын таза сумен түгел қамтуға мүмкіндік туады,- дейді мамандар.

Нұрсұлтан Мұхамеджан, Нұрмахан Мұсатов, Нұрмахан Бекмұратов, 24KZ