АҚШ-та ғалымдар еден жуып жүр. Жұмыс күші тапшылығынан еңбек орындарында олар осындай жұмыстар атқаруға мәжбүр, деп хабарлайды 24kz.
Бұл – Калифорниядағы атақты Йосемити ұлттық саябағындағы жағдай. Өзге саябақтарда да жағдай жетісіп тұрған жоқ. Оған не себеп?
Жұлдыз Атагельдиева, тілші:
- Йосемити – АҚШ-тағы ең көне әрі ең танымал ұлттық саябақтың бірі. Бұл жерге жыл сайын 4 миллиондай адам барады. Қазір демалыс маусымы қызып тұр. Саяхатшылар көп. Бірақ соларға түрлі қызмет көрсететін құтқарушы, рейнджер, тазалаушы сияқты мамандар жетпей жатыр. Жағдайдың ушыққаны соншалық, саябақ қызметкерлері, оның ішінде ғалымдардың өздері де кемпинг аумағындағы әжетханаларды кезек-кезекпен тазалауға мәжбүр.
Кристен Бренгель, АҚШ-тың Ұлттық саябақтарды қорғау қауымдастығының өкілі:
- Мамырдың соңында Еске алу күні саябаққа көп адам келді. Алда да солай болады деп ойлаймын. Демалыс маусымы, мерекелер дегендей. Бірақ келушілердің бәріне қызмет көрсететін адам жетпейді. Сондықтан ғылыми қызметкерлерді басқа жұмыстарға да тартуға мәжбүрміз.
Бұл тек Йосемитиде емес, өзге ұлттық саябақ пен қорықтарда да осындай жағдай қалыптасқан. Өйткені бұрыннан бюджетке дұрыс ақша бөлінбей келген. Ол аздай АҚШ президентінің мемлекеттік шығындарды азайту саясаты жағдайды тіптен ушықтырып жіберді. Дональд Трамп билікке келгелі, яғни, жарты жылдай уақыт ішінде ұлттық саябақтар қызметі 20 мың адамның 13%-і қысқартқан.
Кристен Бренгель, АҚШ-тың Ұлттық саябақтарды қорғау қауымдастығының өкілі:
- Былтыр күн қатты ыстық болды. Биыл жазда жағдай қайталанса, қиын болады. Өйткені рейнджерлер мен құтқарушылар дер кезінде туристерге көмек көрсете алмауы мүмкін.
Жағдайдың ушығуына байланысты АҚШ-тың ішкі істер министрі биыл жазда ұлттық саябақтар қызметіне маусымдық негізде 7,5 мың адамды жұмысқа алуға уәде берген. Бірақ мамырдың статистикасы бойынша тек 3300 адам қабылданған. «Сондықтан маман тапшылығының жуық арада шешілуі екіталай», — дейді сарапшылар.
Авторы: Жұлдыз Атагельдиева
