Орталық Азия елдері қант диабетіне қарсы күш біріктіруді көздеп отыр. Бұл туралы Алматыда өткен VII халықаралық диабетологтар форумында айтылды. Жиында меморандумға қол қойылып, жол картасы бекітілді. Алғашқы бірлескен жоспарда сусамыр ауруын ерте анықтау, халықты ақпараттандыру және емдеу сапасын арттыру жолдары қамтылған. Алдағы уақытта жоспар Азия диабет қауымдастығына таныстырылып, халықаралық бағалаудан өтеді.

Қант диабеті – елімізде кең таралған созылмалы аурулардың бірі. Бүгінде 520 мыңнан астам адам есепте тұр. Жыл сайын мемлекет осы дерттің ем-домына 50 миллиард теңгеден аса қаржы бөледі. Дегенмен науқастар саны жылдан жылға артып келеді, әсіресе балалар арасында өсім байқалып отыр.

Қаламқас Рысбекова, Жетісу облысы бойынша штаттан тыс бас эндокринолог дәрігері:

- Қазір көптеген жеңіл-желпі жасалатын тамақтар көп қолжетімді және онымен қоса газдалған сусындар бар. Соның бәрін қолдану әсерінен қант диабеті өте көп шығып жатыр. Екіншіден, қосымша аурулар. Үлкен кісілердің егде жастағы адамдарда қосымша аурулар көп болғандықтан, оның бәрі ағзаға кері әсерін тигізіп, қант диабетін туғызып жатыр.

Форумда ұсынылған аймақтық жоспардың басты мақсаты – қант диабетін емдеудің бірыңғай тәсілдерін енгізу. Науқастардың емді тұрақты қабылдауын арттыру және эндокринология саласындағы медициналық қызметті жақсарту. Мамандар бұл жоспар аясында арнайы Ұлттық эндокринология институтын құруды ұсынып отыр.

Жангентхан Абылайұлы, С. Асфендияров атындағы ҚазҰМУ эндокринология кафедрасының профессоры:

- Жаңадан шыққан емдерге байланысты мүмкін бізге Диабет ғылыми-зерттеу институтын, Эндокринология институтын ашу керек. Соларды бір жерге ұйымдастырып, шашыратпай, әрі қарай дамуы үшін біз ғылымды, емдеуді, диагностикалық жолдарды және де диабетті алдын ала тексеріп, соны тоқтату жөнінде мәселелерді мемлекеттің алдына қоямыз.

Дәрігерлердің айтуынша сусамырға шалдыққандардың барлығы бірдей мамандардың кеңесіне құлақ түре бермейді, емді уақытында қабылдамайды. Форумда қаржыландыру мәселесі де қаралды. Мысалы, Алматыда бір науқасқа жылына 150 мың теңге бөлінсе, кей өңірлерде бұл сома екі есе аз. Жаңа жоспар жүзеге асса, осындай теңсіздікті жойып, емнің тиімділігін арттырмақ.

Авторлары: Алуа Ералықызы, Эдуард Кон