Алматы қаласының қоғамдық денсаулық сақтау басқармасына жаңа басшы тағайындалды, — деп хабарлайды Massaget.kz тілшісі қалалық әкімдіктің баспасөз қызметіне сілтеме жасап.
Дархан Сатыбалды Алматы қаласының жаңа бас дәрігерін тағайындады.
"Алматы қаласының әкімі Дархан Сатыбалдының 2025 жылғы 21 шілдедегі өкімімен Қоғамдық денсаулық сақтау басқармасының басшысы болып Марат Орынбасарұлы Пашимов тағайындалды", – делінген хабарламада.
Айта кетсек, Марат Пашимов 1981 жылдың 4 қазанында туған. Медицина ғылымдарының кандидаты.
Денсаулық сақтау саласында 2003 жылдан бері жұмыс істейді. Әр жылдары медбике, анестезиолог-дәрігер, жансақтау және телемедицина бөлімшесінің меңгерушісі, төтенше жағдайлар және әдістемелік-ұйымдастыру жұмыстары жөніндегі бас дәрігердің орынбасары қызметтерін атқарған. Сондай-ақ қалалық емхананы, облыстық клиникалық аурухананы және қоғамдық денсаулық сақтау басқармасын басқарған.
2023 жылдан бастап Алматыдағы "Кардиология және ішкі аурулар ғылыми-зерттеу институты" АҚ басқарма төрағасы қызметін атқарды.
Еске салсақ, 11 шілдеде Алматы қаласы Қоғамдық денсаулық сақтау басқармасының бұрынғы басшысы Асия Ақанова қызметінен кеткені хабарланған еді.
Өзекті жаңалықтарды өз уақытында оқу үшін Facebook парақшамызға жазылыңыз!
