Жаңаөзен кәсіпкерлері жылыжайда құлпынай өсіріп отыр, деп хабарлайды 24KZ. Бұл жобаның Маңғыстау облысында баламасы жоқ. Іскер азаматтар топырақсыз ортада жеміс көшеттерін егіп, жасыл желекті тамшылатып суару әдісімен аз уақытта жайқалтып шығарған. Биыл олар 8 тонна өнім жинап, қаладағы дүкендерге жеткізуді жоспарлап қойған. Айта кетсек, шалғай аймаққа жеміс-жидектің 85%-і шетелден тасымалданады.

Бұл жерде 6 жылыжай бар. Былтыр оларға 15 мың құлпынай көшеті егілген. Кәсіпкер: «Кокос үгіндісі араласқан субстратта жеміс тез жетіледі», – дейді. Қазір жұмысшылар кезекті өнімді жинауға кіріскен.

Жылыжайда құлпынай егуді екі кәсіпкер бірлесе қолға алған. Олар жер үйдің іргесінен жоба құрылысын жүргізіп, құрал-жабдығын Қытайдан әкелген. 20-25 градуста тез өсетінін байқаған соң жеміс көшеттері салқындатқыш жүйе арқылы тәулік бойы күтіп-бапталады екен. Дайын өнімді теруге 4 адам жұмысқа алынған.

Рашит Жомартов, кәсіпкер:

- Қазіргі таңда күн сайын өнім. Шыққан құлпынайды жинап, өзіміздің жергілікті дүкендерге тапсырып отырмыз. Осы құлпынайды Жаңаөзен қаласы бойынша біз бірінші болып бастағанбыз. Гидпоникалық әдіспен, яғни тамшылатып суару. Өзінің базалық қоректенуі бар. Жыл бойына 8-9 тонна өнім аламыз деген жоспарымыз бар.

Іскер азаматтар жыл он екі ай құлпынайдың 3 сұрпын өсіруді жоспарлап отыр. Былтыр қыста жылыжайда жылу болмағандықтан, ерекше кәсіп тоқтап қала жаздапты. Жылу құбырын жүргізу үшін жер орнының нысаналы мақсатын өзгерту қажет болған. Мәселенің шешілуіне өңірлік кәсіпкерлер палатасының мамандары қол ұшын созыпты.

Ақиқат Шарапатдинов, облыстық Кәсіпкерлер палатасы Жаңаөзен филиалының директоры:

- Қазіргі таңда бұл өндіріс тұрғын үй аймағында басталған болатын. Ал субсидия алу үшін мұның нысаналы мақсатын ғана ауыстыру керек болды. Ол туралы ақпаратты бұл кәсіпкер білмеген және әлеуетін көріп, қала әкімдігімен келісім жүргізіп, бұл кәсіпкерлердің қосымша жер алуына мүмкіндік жасап жатырмыз. Әрі қарай да бұл кәсіптің өрбитініне біздің сеніміміз кәміл.

Жаңаөзенде өндірілген құлпынайдың жергілікті нарықта сатылымын бағамдау мақсатында дүкендерді араладық. Қала халқы негізінен шетелден әкелінетін жемістің енді қыс айлары да Маңғыстауда қолжетімді боларын естіп, таңғалысты.

Ләйла Ғимранқызы, қала тұрғыны:

- Өзіміздің жерден шығып жатқаннан кейін жаңағы әртүрлі дәмдеуіштер, нитраттар қосылмаған шығар деп ойлаймын.

Фарида Тұрлыбайқызы, қала тұрғыны:

- Әрине, өзіміздің жергілікті жемістерді жегеніміз жақсы. Көбейе берсін. Тек құлпынай емес, басқалары да шықсын.

Жаңаөзенде 12 мыңнан астам кәсіпкерлік субъектісі тіркелген. Бұл былтырғы жылға қарағанда 20% көп. Арасында сабын өндірісі, бассейнде ханбалық өсіру, жұмысшыларға арналған киім тігу секілді ерекше бастаманы қолға алғандар да бар. Отандық өнімдер «Қазақстанның үздік тауары» ұлттық байқауының өңірлік кезеңінде көрмеге қойылды.

Авторлары: Талғат Исламұлы, Саламат Бекбаев