Жол талғамайтын көліктің иесі анықталып, бірден бөлімшеге шақыртылған.

Маңғыстау облысында жол ережесін өрескел бұзған жүргізуші анықталды, деп жазады inbusiness.kz сайты "Лада" басылымына сілтеме жасап.

Жаңаөзен қаласында кәмелетке толмаған баланың көлік тізгінінде отырған сәті түсірілген видео әлеуметтік желілерде таралып, қызу талқыланды. Маңғыстау облыстық полиция департаментінің мамандары мониторинг барысында бұл заңсыздықты байқаған.

Тексеріс кезінде көлік иесінің 2014 жылы туған баласы көлік басқарғаны белгілі болды. Тәртіп сақшылары ер адамға қатысты бірден 2 бап бойынша әкімшілік хаттама толтырды.

Атап айтқанда, Қазақстан Республикасының ӘҚБтК-нің 612-бабы 5-бөлігі бойынша оған 50 АЕК көлемінде, яғни 216 250 теңге айыппұл салынды. Сонымен қатар Қазақстан Республикасының ӘҚБтК-нің 593-бабы бойынша 5 АЕК, яғни 21 625 теңге айыппұл қарастырылған.

"Көлікті басқару тек дағдыны ғана емес, жоғары жауапкершілікті талап етеді. Рөлді балаларға сеніп тапсыру – заңды бұзу ғана емес, айналадағы адамдардың өміріне қауіп төндіру", – деп атап өтті полиция департаменті.

Қазіргі уақытта жол талғамайтын көлік айып тұрағына қойылды.