Астаналық шебер 1 айда 100-ге тарта домбыра жасайды.

Шебердің ағаштан жоңып жасаған аспабы үлкен сұранысқа ие. Тіпті атадан балаға мирас болып келеді.

Нұржан Ділмәнов домбыра жасауды 15 жасында меңгерген. Содан бері шебердің қолынан 5 мыңға тарта ұлттық аспап шыққан. Ұста көбіне қайың, жаңғақ пен қызыл ағашты қолданады. Сонда аспаптың дыбысы таза шығады дейді шебер.

Нұржан Ділмәнов, шебер:

- Домбыраның дыбысы бет ағашында. Бет ағашы 5-6 жыл кепкен ағаш болса. Біз бірінші дыбысына мән береміз. Бет ағашты қойып алғаннан кейін шығанаққа мән береміз. Шығанақтан шығып кетпеу керек дыбыс.

20 жылда 53 түрлі аспап жасаған шебер қазір өнерпаздардың басым бөлігі домбыраны күтіп ұстамайды, дейді. Егер ұлттық аспап дұрыс сақталса шөбереге, тіпті шөпшекке дейін мұра болып қалады.

Нұржан Ділмәнов, шебер:

- Домбыраны қазір дұрыс сақтамайды. Кафельге, терезенің алдына, пештің жанына қоя салады. Ағаш деген дымқылды өзіне тартып алады. Содан беті көтеріліп, ойнағанда ауыр болады. Көбінесе оны шеберлерден көріп жатады.

Ділмәновтың домбыралары 100-ге тарта өнер майталманының қолында жүр. Әнші, күйшіден бөлек айтыскер ақындар да тапсырыс береді.

Мейірбек Саламатов, айтыскер ақын:

Нағыз қазақ қазақ емес, нағыз қазақ домбыра. Осы бір ұлттық аспап арқылы ұлтымыздың құндылығын құнттап, дәстүрімізді дәріптеп жүрміз. Өскелең ұрпақты бала жастан ұлттық мұраға бейімдесек, ұлт ретінде ұтарымыз көп болады, дейді шебер.

Әлішер Әли