Қазақстандық мұсылмандар үшін Counter Strike пен Dota 2 және ГТА ойындарын ойнауға тыйым салынған. Әлеуметтік желілерде бірнеше күннен бері Мүфтият осындай пәтуа шығарды деген ақпарат желдей есті. Ал отандық киберспорт саласының мамандары : «Бұл шешім рас болса келіспейміз», – дейді.

Зорлық-зомбылық, кісі өлтіру, соғыс, құдайға қарсы немесе дінді мазақ ету көріністері қамтылатын барлық ойынға қатаң тыйым салынған. Алайда бұл жөнінде ресми пәтуа қабылданбаған. «Ең бастысы ойын құмарлығына салынбасаң болды», – дейді ҚМДБ өкілі.

Медет Құрмашұлы, Шариғат және пәтуа бөлімінің маманы:

- Балалар ойнауы мүмкін. Балалардың психикасына, болмысына әсер етсе, соған беріліп кетіп, уақытының көбін сонымен өткізсе, ол уақытта да ол шариғатымызда мақұлданбайды. Пайғамбарымыздың хадисі бар ғой. «Екі нығымет бар, оны адамдардың көбі білмейді. Бірі – оның денсаулығы, екіншісі – уақыты», – дейді.

Мүфтият агрессиялық ойындардың орнына логикалық, танымдық қабілеттерін арттыратын ойындарды ойнауға кеңес береді. Олардың ойынша, ішінде шариғатқа қарсы дүниелер болмаса жеткілікті.

Медет Құрмашұлы, Шариғат және пәтуа бөлімінің маманы:

- Өзіміздің жоғарыда айтып өткен шарттар бар ғой. Сол шарттардың шеңберінде болса, шариғатқа қарсы амал болмаса, адамға пайдалы болса, ол уақытта, әлбетте, ойнауға рұқсат. Мен жалпы компьютерлік ойындарды өзім ойнамағаннан кейін ол қандай ойындар екенін нақты білмейді екенмін.

Ал киберспорт саласының мамандары мүфтияттың бұл пікірімен келіспейді.

Азамат Пірманов, сарапшы:

- Өйтіп сүйенетін болсақ, мұрын қанататын бокс бар. UFC бар. Төбелесіп, күш көрсетеді. Иә. Ойын. Психологиялық тұрғыда жастарға зиянын беретін шығар, бірақ ата-аналар балаларға мұны «әшейін ойын немесе кәсіп ретінде ақша істей аласың», – деп үйрететін болса, менің ойымша, басқаша қабылдайды. ҚМДБ-мен сөз таластыра алмаймын. Өйткені білімім де, ілімім де жетпейді. Бірақ өз ойым, қазір араб елдері оны қатты дамытып жатыр. Бірақ бізде неге тыйым болып жатқанын білмеймін.

Иә, Counter Strike пен Dota секілді әлемдік танымал ойындардың ішінде зорлық-зомбылық элементтері мен шариғатқа сай емес контент бар. Бірақ «Киберспортшылар оны кәсіп көзіне айналдырып, ел экономикасына ақша құйып жатыр. Тіпті халықаралық ареналарда ел намысын қорғап, Қазақстанның абыройын асқақтатып жүр», – дейді сарапшылар..

Азамат Пірманов, сарапшы:

- Қазақстанның киберспортшылары қатты ойнаса, оны бүкіл әлем біледі. Ойынға Қазақстан жалауын қосты. Кезінде Counter Strike-тан Қазақстан чемпион болған кезде Қазақстан жалауын қыстыратын болды. Киберспорттың қазір ауқымы өте кең. Бұрын Олимпиаданы көп көретін еді ғой, бәрі қазір киберспортты көп көреді. Қазір МОК мұны бақылап жатыр.

Азамат Пірманов осы ойындар арқылы да баланың шығармашылық қабілетін арттырып, логикалық ойлау деңгейін жетілдіруге болады деп санайды. «Бастысы өзіңе керегін алып, уақытында тоқтай білу керек», – дейді.

Авторлары: Мерей Қанапия, Ержан Қанапия