Шалғайдағы Үржарда ашылған қосымша білім беру мекемесінде ауыл балалары бос уақытын тиімді өткізеді.

Түрлі аспаптар үйірмесі бар. Жергілікті мамандар жеткіншектерді өнерге баулып жүр. Орталық жекенің меншігі болғанымен әлеуметтік жобаларды іске асырып отыр. Жалпы Абай облысы бойынша 24 мемлекеттік қосымша білім беру ұйымы бар. Оларға 17 мың бала барады.

Арайлым Дәуренқызы өнер орталығы ашылғалы домбыра үйірмесіне тұрақты түрде келіп жүр. Айтуынша, ұлттық аспапқа бала кезінен қызыққан. Ата -әженің өнегесі мен тәрбиесі болар, өнерге құштар болып өсті. Арайлым домбыраны тек хобби емес, кәсіби деңгейде меңгеріп, үлкен сахналарға шығуды мақсат етеді.

Арайлым Дәуренқызы, оқушы:

- Мен осы өнер орталығына домбыра шертуге өзімнің қызығушығылыммен келдім. Бұл орталықтың ашылғанына бір жыл болып қалды. Біз өзіміздің мұғалімімізбен көптеген байқауларға қатысып, көптеген жетістіктерге жеттік. Домбырада ойнау өте қызықты. Біз осы жерде мұғалімімізбен бірге көптеген күйлерді үйренеміз.

Шығармашылық орталықта оқушылар би өнерімен де шұғылданады. Гитара, домбыра сынды музыкалық аспаптарда ойнап, сурет салады. Осылайша аудан жастары кәсіби мамандардан дәріс алып, шығармашылығын дамытып жүр.

Наталья Анистратова, хореограф:

- Біз ұлттық би өнерімен шұғылданамыз. Үйірмемізде кіші, орта және жоғары топтар жұмыс істейді. Балалардың жақсы нәтиже көрсетуіне арнайы дайындық курстары үлкен септігін тигізуде. Былтыр Талғар қаласына барып, байқауға қатыстық. Оқушыларым бірінші орынды жеңіп алды. Бұл шәкірттеріміздің еңбегі, ұстаздардың шеберлігі және үздіксіз дайындықтың жемісі.

Өнер орталығы Үржар ауданы бойынша балалардың шығармашылығын дамытатын жалғыз мекеме. Бүгінде үш жүзге жуық бала өнердің әр саласы бойынша білім алып жүр. Мұнда 5 түрлі үйірме бар, 9 адам жұмыс істейді. Бастысы, барлығы ауыл балалары үшін тегін ұйымдастырылған.

Арай Ғаббасова, өнер орталығының меңгерушісі:

- Қазір қалай балалардың көбі телефон мен гаджеттерге отырып алған. Кішкене болса да пайдасы тисін деп осындай үйірмелер ашылған. Ауылдардан келетіндер енді көп. Аптасына үш уақыт бізде. Өздерінің кестелеріне байланысты. Сабаққа бөгет болмайтындай қойғанбыз. Биыл міне Жауқазынның отыз жылдығы. Міне бұйрса гала концертіне де өттік.

Үржарда ашылған өнер орталығы жас буынның шығармашылық қабілетін ұштап, өнерін шыңдауға жол ашты. Орталық жеткіншектері облыстық, республикалық деңгейдегі байқауларда топ жарып жүр.

Рүстем Қайратұлы, Берік Жобалайұлы