Ел парламенті сенатында «Жасыл» инвестициялар тарту, қолжетімді үздік техниканы кеңінен қолдану сияқты өзекті мәселелер талқыланып жатыр. Экологиялық кодекс нормаларының іске асырылуын зерделеп жатқан Сенаттағы үкімет сағатынан әріптесім Азамат Бейбітұлы тікелей байланысқа шыққалы тұр. Азамат, елдегі экологиялық ахуалымыз қандай, әуелі осыны айтшы?

Азамат Бейбітұлы, тілші:

Қайырлы күн, Армангүл. Бүгінде Алматы, Атырау, Қарағанды, Теміртау, Шымкент, Өскемен және Балқаш қалаларында атмосфералық ауаның ластану деңгейі жоғары күйінде қалып отыр. Бұл туралы сенатор Әли Бектаев мәлімдеді. Режиссёр әріптестер, спикердің сөзін назарға ұсынса...

Әли Бектаев, Сенат депутаты:

Өкінішке орай елімізде озық қолжетімді техникаларға көшу процесі басталғанымен, оны іске асыру әрекеті көптеген жүйелік кедергілерге тап болуда. Олардың ішінде, қаржылық, технологиялық, логистикалық, ұйымдастырушылық проблемалар да бар.

Азамат Бейбітұлы, тілші:

Мәселенің бір шешімі салық болғалы тұр. Елімізде I санаттағы шамамен 1500 кәсіпорын бар. Олардың бәрі де ең озық әрі қолжетімді технологияны қолдануға міндетті. Биылдан бастап 50 кәсіпорын, ал қалғандары 2031 жылдан әрі қарай талапты орындауы керек. Егер талап орындалмаса, кәсіпорындар жыл өткен сайын шығынға бата бермек. Өйткені үш жыл сайын екі, төрт және сегіз есе өсетін жоғары экологиялық салық мөлшерлемесі қолданылады. Мысалы белгілі бір кәсіпорын қоршаған ортаға әсері үшін жыл сайын 15 млрд теңге салық төлеп келсе, 2025 жылдан бастап бұл сома 30 млрд теңгеге, 2028 жылы 60 млрд теңгеге, ал 2031 жылы 120 млрд теңгеге дейін өседі. Ал ең үздік қолжетімді технологияларды енгізіп, кешенді экологиялық рұқсат алған кәсіпорындар керісінше осы төлемдерден босатылады.

Азамат Бейбітұлы