Биыл Шығыс Қазақстан облысының ауылдарында 39 өрт сөндіру бекетін ашу жоспарланған. Осы күні Глубокое және Шемонаиха аудандарында стратегиялық маңызы бар нысандар жұмысын бастап кетті.

Аталған екі ауданда орманды жерлер мен егістік алқабы көп. «Сондықтан өрт қауіпсіздігі басты назарда», — дейді жуаптылар. Мысалы, шалғайдағы Тарханка елді мекеніндегі бекет үш мың адам тұратын үш ауылды қамтиды. Жалпы еліміз бойынша жүздеген ауылда биыл арнайы бекет ашылды.

Өрт сөндірушелер оқиға орнына 5-10 минут аралығында жете алады. Төтенше жағдайлар министрлігі бекеттерді заманауи техника және байланыс құралдарымен жабдықтады. Ал бекет орналасқан ғимаратты жергілікті кәсіпкерлер ұсынды. Кадрмен қамтамасыз ету және жалақы төлеу мәселесі жергілікті әкімшілікке жүктелді.

Ерлан Төрегелдиев, ҚР ТЖМ өртке қарсы қызмет комитетінің төрағасы:

- Бұл бағдарламаның еліміз үшін маңызы зор. Себебі 150 өрт сөндіру бекеті жүздеген елді мекеннің, оларда тұратын азаматтардың, айналасында орналасқан егіс алқаптары, ормандардың, кәсіпорын, мекемелердің қауіпсіздігін қамтамасыз етеді.