Алматы облысы Жамбыл ауданындағы үш елді мекенде жаңа өрт сөндіру бекеті ашылады.
Маңызды нысандар республикалық «Ауыл құтқарушылары» бағдарламасы аясында салынады. Бұл ауылдағы өртке қарсы инфрақұрылымды нығайтумен қатар төтенше жағдайларға қарсы дайындықты арттыруға сеп болмақ.
Жамбыл ауданындағы Мәтібұлақ ауылдық округінің құрамында 8 елді мекен бар. Онда 5 мыңға жуық халық тұрады. «Ауыл құтқарушылары» бағдарламасы аясында жақында жаңа өрт сөндіру бекеті пайдалануға беріледі.
Тапалай Байсабаев, Мәтібұлақ ауылының тұрғыны:
- Өрт бола қалған кезде біз ауылда көп әбігерге түсеміз. Мынау военныйларды шақыртады. Содан кейін ауданнан 120 км қашықтықтамыз. Ол жақтан өрт сөндіру машинасымен келгенше өрт сөндірушілер, біздің өрттің өзі өшіп, қоламтасы ғана қалады. Ал енді мынау өрт сөндіру бекетін салып жатыр. Оның өзін мемлекеттің халыққа жасаған қамқорлығы деп түсінеді халық.
Азамат Сұлтанов, аудан әкімінің орынбасары:
- Төтенше жағдайлар министрлігінің қолдауымен бүгінгі таңда осы округке жаңағы өрт сөндіру автокөлігі берілді. Бұл өте қажет. Осы айдың соңына дейін, келесі айдың ортасына дейін бұйырса қолданысқа беріледі деп отырмыз. Бұл ауыл тұрғындарының өмір сүру сапасын арттырады деген ойдамыз.
Жамбыл ауданында өткен жылы 57 өрт оқиғасы болса, биыл 7 айдың ішінде 83 дерек тіркелді. Қаза тапқандар саны төрт есе өскен. Елді мекендердің аудан орталығынан қашықта орналасуы дер кезінде өртке қарсы әрекет етуді қиындатады. «Ауыл құтқарушылары» бағдарламасы бойынша жаңа өрт сөндіру бекеттерінің құрылысы Ақтерек пен Қазыбек би ауылында да жүріп жатыр.
Бейбіт Рақымжанов, аудандық ТЖБ бастығы:
- Осы ауыл тұрғындарының, ауылдың ішіндегі жаңағы азаматтар белсенділік танытып, өздерінің қаражаттарына осындай жаңағы бекеттерді салып жатыр. Қазіргі кезде Жамбыл ауданында 15 бекет бар. Әр ауылда 4 қызметкерден жұмыс жасап жатыр.
Ерлан Төрегелдиев, ҚР ТЖМ өртке қарсы қызмет комитетінің төрағасы:
- Алматы облысында «Ауыл құтқарушылары» бағдарламасының сәтті жүзеге асып жатқанын айта кеткен жөн. Бұл бекеттер бір ауылға ғана емес, осы маңдағы бірнеше елді мекенге қызмет көрсетеді. Өрт сөндіру бекеттерін қажетті техникамен, құрал-саймандармен жабдықтап, мамандарды өзіміз қайта дайындықтан өткіземіз.
Жамбыл ауданында алдағы күзде пайдалануға берілетін үш жаңа өрт сөндіру бекеті 9 елді мекенді қамтиды. Соның арқасында 13 мыңнан астам халық өрттен қорғау техникасымен және қызметкерлерімен қамтамасыз етіледі. Бұл айрықша мән берерлік жағдай. Өйткені еліміз бойынша өткен 7 айдың ішінде 7200-ден астам өрт оқиғасы тіркелген.
Ардақ Айбарұлы, Аманжол Жөңкешов
