Шерзат Полаттың отбасы сотта айыпталушылардан моральдық зиянды өтеу үшін 660 миллион теңгеден астам өтемақы талап етті, деп хабарлайды Egemen.kz.

Бүгін өткен сот отырысында жәбірленуші тараптың адвокаты Мейірман Шекеев өз қорғауындағы тарап – Қаржаубай Нұрымов, оның жұбайы Гүлбара Бишимбаева және Шерзаттың әжесі Жұмабике Қадырованың атынан азаматтық талап арызды жария етті. Атап айтсақ:

• Қаржаубай Нұрымовтың пайдасына ұлының жерлеу рәсіміне жұмсалған шығын ретінде Абзал Шынасылдан 2 млн 794 мың теңге материалдық шығын өндіру;
• Абзал Шынасыл мен Равиль Сакиевтен Қаржаубай Нұрымовтың пайдасына бұзақылық салдарынан келген моральдық зиян үшін 100 миллион теңге (әрқайсысынан 50 миллион теңгеден);
• Осы екеуінен Гүлбара Бейшенбиеваның пайдасына – 100 миллион теңге (солидарлы түрде);
• Осы екеуінен Жұмабике Қадырованың пайдасына – 100 миллион теңге (солидарлы түрде).
• Шыңғыс Белгожаев, Дархан Әскентаев, Нұркияс Ілиясов, Дидар Қалиахмет, Азамат және Нұрбол Тоқтаубаевтардан Қаржаубай Нұрымовтың пайдасына әрқайсысынан 20 миллион теңгеден, барлығы – 120 миллион теңге.
• Осы тұлғалардың әрқайсысынан Гүлбара Бейшенбиеваға да 20 миллион теңгеден, жалпы – 120 миллион теңге.
• Сол тұлғалардың әрқайсысынан Жұмабике Қадыроваға да 20 миллион теңгеден, жалпы – 120 миллион теңге.

Осылайша, отбасы моральдық зиянның жалпы көлемін 662 794 мың теңгеге бағалап отыр.