Елімізде жеке куәлікті eGov порталында немесе мобильді қосымшада рәсімдеуге болады, деп жазады Egemen.kz.

Қазақстанда жеке куәлікті онлайн форматта рәсімдеуге мүмкіндік беретін пилоттық жоба іске қосылды. Бұл туралы Ішкі істер министрлігі мен Цифрлық даму, инновациялар және аэроғарыш өнеркәсібі министрлігінің бірлескен бұйрығында хабарланды.

Жоба мемлекеттік қызмет көрсетуді тиімді ету мақсатында әзірленді. Енді азаматтар жарамдылық мерзімі аяқталған жеке куәліктерін электрондық үкімет порталы (eGov.kz) немесе eGov Mobile қосымшасы арқылы жаңарта алады.

Онлайн рәсімдеу тәртібі:

1. ЭЦҚ арқылы өтініш беру: eGov порталында немесе мобильді қосымшада электрондық цифрлық қолтаңба (ЭЦҚ) арқылы өтініш толтырып, қол қою қажет.
2. Фотосурет жүктеу: Қажетті форматтағы фотосуретті түсіріп, өтінішке тіркеу керек.
3. Мәліметтерді тексеру: Жүйе өтінішті тіркеген соң, деректердің дұрыстығын, бұрынғы куәліктің мерзімін және фотосуреттің сәйкестігін автоматты түрде тексереді.
4. Мемлекеттік бажды төлеу: Өтініш қабылданған соң заңда белгіленген мемлекеттік баж төленеді.
5. Құжатты алу: Дайын жеке куәлікті ХҚКО-дан немесе басқа белгіленген орыннан алуға болады.

Бұл цифрландыру аясындағы жаңа қызмет азаматтарға уақыт үнемдеуге және қағазбастылықты азайтуға мүмкіндік береді.

Жанель ТӨЛЕУБЕКОВА, ЕҰУ студенті