Жаңа бастама мүгедектігі бар азаматтарға көрсетілетін қолдау жүйесін цифрландыруға және оны икемді форматқа көшіруге бағытталған.

ҚР Еңбек және халықты әлеуметтік қорғау министрлігі жеке көмекші қызметін көрсету қағидаларына өзгерістер енгізу жобасын қоғамдық талқылауға ұсынды, деп хабарлайды inbusiness.kz сайты.

Жобаға сәйкес, жеке көмекші қызметі азаматтық-құқықтық қатынас ретінде бекітіледі. Бұл оның еңбек қатынастары санатына жатпайтынын білдіреді. Нәтижесінде табель жүргізу мен қатаң жұмыс кестелері сияқты бюрократиялық талаптар қысқартылмақ.

Қызмет көрсету Әлеуметтік қызметтер порталы арқылы азаматтың нақты өтінімі негізінде жүзеге асырылады. Сүйемелдеу тек қажетті жағдайларда – медициналық мекемелерге, мемлекеттік органдарға немесе басқа да нысандарға бару кезінде ұсынылады.

Төлем орындалған әр өтінім бойынша жүргізіледі, ал қызметтің атқарылуы жүйе арқылы расталады. Бұл қаражаттың тиімді әрі мақсатты жұмсалуын қамтамасыз етеді.

Сонымен қатар, тараптардың құқықтары мен міндеттері көрсетілген үлгілік шарт енгізу жоспарланып отыр.