Әйгілі «Гүлдер» эстрадалық би ансамблі Малайзия төрінде өнер көрсетті. Шығармашылық ұжымның концерті «Asean 2025» халықаралық музыкалық-мәдени фестивалі аясында ұйымдастырылды.
Куала-Лумпур сахнасында ансамбль хореографиялық қойылымдар мен музыкалық нөмірлерін ұсынды. Іс-шараға әлемнің бірқатар елінен 300-ден астам көрермен жиналды.
«Гүлдер» ансамблінің өнері әртүрлі жанрлар мен мәдени дәстүрлердің үндестігін көрсетті. Концерт барысында көрермен назарына 20 нөмірден тұратын бағдарлама ұсынылды. Кеште «Дударай» әні орындалып, «Аққу», «Асатаяқ», «Қуаныш думан» қойылымдарымен бірге малайзиялық, моңғол және қытай билері сахналанды.
Шығармашылық ұжым Куала-Лумпурдағы концертке бірнеше ай дайындалған. Ансамбльдің көркемдік жетекшісінің айтуынша, бағдарлама халықаралық көрерменнің ерекшеліктерін ескере отырып бірнеше рет толықтырылып, жаңартылған.
Абзал Өсімбаев, «Gulder» ансамблінің көркемдік жетекшісі:
- Музыка сөзсіз түсіндірсе, би қозғалысымен түсіндіреді ғой. Адамның жүрегіне жеткізе алатын үлкен бір шыңы деп есептеймін. Оның орны өте маңызды. «Гүлдер» ансамблі жаңа жаңғыртылғаннан бері төрт жыл бұрын бүгінгі күнге дейін репертуарға 80-90 жаңа туындылар қосқан болатын. Соның 20-ын бүгін алып келдік.
Анвара Садықова, «Gulder» ансамблінің бас балетмейстері:
- Бүгінде жаңартылған құрамның басты мақсаты – ұлттық негізді сақтай отырып, заман талабына сай даму. «Гүлдер» ансамблі 1969 жылы эстрадалық-жастар ұжымы ретінде құрылған. Ол кезде эстрадалық өнер енді ғана қалыптаса бастаған. Сол кезде ұлттық би жаңа стильде ұсынылып, ұлттық өнер үшін тың серпіліс әкелді.
Малайзия – ансамбльдің жаңа құрамының өнерін тамашалаған 13-ші ел. Соңғы үш жылда шығармашылық ұжым Швеция, Франция, Германия, Латвия, Қытай және Түркия сынды елдерінде өнер көрсетті.
Авторлары: Әнел Еділқызы, Иманәлі Әнуар
