Оңтүстік-Шығыс Азияның бір бөлігін су басты. Вьетнам, Таиланд, Малайзия, Индонезияда 2 аптадан бері тасқын жүріп, миллиондаған адам қайда қашарын білмей қалды. Метеорологтар: «бұл жағдай әлі де біразға созылады», – дейді. Қазір туристер тұрмақ, жергілікті тұрғындардың өзі паналайтын жер таппай жүр.

Бұл «Кото» және «Сеньяр» атты екі циклонның салдары. Малакка шығанағындағы табиғи құбылыс қатты жауын-шашынның пайда болуына түрткі болды. Оның әсері Таиландта кейінгі үш ғасырда болмаған алапат тасқынға әкелді. Елдің оңтүстігіндегі 10 провинция, соның ішінде Хатъяй қаласы қатты зардап шекті. Табиғи апаттан 8 күнде 33 адам опат болды. Ал 3 миллион тұрғын далада қалды.

Ал енді бірі керек-жарағын арқалап, толарсақтан саз кешіп, өлместің амалын қылып жүр.

Перлиса Ахмад, тұрғын:

- Ең қажетті заттарымды өзіммен алып шығуға үйге кіргенмін. Бірақ су тізеге дейін жетеді. Бәрі бүлінген. Тек отбасыма қажет дәрі-дәрмекті жинап үлгердім. Біз мұндай жағдайға дайын болмадық. Өйткені мұндай жойқын тасқын кейінгі уақытта болған жоқ.

Вьетнам, Таиланд, Малайзия, Индонезия. Оңтүстік-Шығыс Азиядағы танымал туристік бағыт. Тұмса табиғаты біраз табыс әкеледі. Ал енді табиғи апат жиілеп, бұл елдерде демалушылар қарасы азайған. Кейінгі екі аптада туристік компаниялар қызметін уақытша тоқтатып, шетелдік азаматтар қауіпті аймақтардан көшірілді. Ресми ақпар бойынша Таиландта 4 мың, Малайзияда 11 мың турист зардап шеккен.

Теуку Файсал Фатани, метеоролог:

- Экстремалды табиғи апат қаупінің деңгейі жоғары. Әрі ол күшейеді. Сондықтан сақтық шараларын алдын ала қабылдап, гидрометеорологиялық апатқа сақадай сай болу керек.

Таиланд, Малайзия елдерінің сыртқы істер министрілігін ресми сайтында саяхатшыларға күн райына байланысты ескертулерді назардан тыс қалдырмай, қатерге алдын ала дайын болуы жөнінде жазылған. Әрі бұл елдерде әуежай қызметі де уақытша тоқтап тұр. Сондықтан Оңтүстік-Шығыс Азия елдеріне саяхаттауды жоспарлаған кезде мұқият болу маңызды.

Авторы: Фариза Жанғанаева