Шығыс Қазақстан облысында әлеуметтік-экономикалық дамудың оң динамикасы сақталып келеді.

10 айдың қорытындысы бойынша жұмыссыздық деңгейі 4,6% мөлшерінде сақталды, деп жазады inbusiness.kz сайты.

Өңірде 25 мыңнан астам жұмыс орны құрылса, оның ішіндегі 19 мыңы тұрақты жұмыс. Орташа жалақы 9,5%-ға өсіп, 403 мың теңгеге жетті.

Президент жүктеген 2029 жылға дейін экономикалық өсімнің қарқынын екі есеге арттыру міндетін орындау мақсатында облыс экономикасын әртараптандыруға басымдық берілген. Бұл ретте өңірлік жалпы өнім құрылымындағы өнеркәсіптің жоғары үлесі ескеріліп отыр.

Қазіргі уақытта Үлкен Нарын ауданында жалпы инвестиция көлемі 12,6 млрд теңгені құрайтын 5 жылдық даму жоспары жүзеге асырылып келеді. Туризм және шағын кәсіпкерлік бағытында бірқатар жоба іске асырылып жатыр. Атап айтқанда:

• "Приморск" туристік базасы кеңейтілді;
• 24 орындық хостел, ет өңдеу цехы, шағын қонақүй және наубайхана ашылды;
• пантымен емдеу орталығының құрылысы жүріп жатыр.

Аудан әкіміне салықтық базаны кеңейту және қосымша кіріс көздерін іздестіру жұмыстарын күшейту тапсырылды.