Сондай-ақ, өңірге тыйым салынған заттарды жеткізу жолдары жабылды.

Павлодар облысының аумағында есірткі қылмысына қарсы күрес жүйелі түрде жүргізіліп келеді. Соның нәтижесінде 232 құқықбұзушылық анықталды, деп хабарлайды inbusiness.kz тілшісі.

Жергілікті полиция департаменті есірткі қылмысына қарсы іс-қимыл басқармасының бастығы Арсен Айғазиннің айтуынша, жыл басынан өңірде есірткі және психотроптық заттардың заңсыз айналымына қатысты 124 қылмыстық іс сотқа жіберілген. Заңсыз айналыммен айналысқан 67 адам ұсталды, оның бесеуі – ұйымдасқан қылмыстық топтың мүшелері.

Қабылданған шаралар нәтижесінде 542 келіден астам есірткі құралдары, психотроптық және күшті әсер ететін заттар, есірткі құрамдас өсімдіктер тәркіленді. Сонымен қатар, өсімдіктерді заңсыз өсіруге байланысты бес қылмыс анықталды.

"Оған қоса, облыс аумағына есірткі жеткізудің 11 арнасы жабылды. Сауда алаңдарында жұмыс істеген төрт интернет-дүкеннің қызметі тоқтатылды. Жаңа цифрлық шешімдердің арқасында мыңнан астам есірткі сайты бұғатталды. Тәртіп сақшылары 596 әкімшілік құқықбұзушылықты анықтаған. Оның ішінде қоғамдық емес жерде тыйым салынған заттарды қолдануға қатысты 199, есірткілік масаң күйде көлік басқару бойынша 343 дерек тіркелді", – деді Арсен Айғазин.

Бұл ретте полиция департаменті "Заң және тәртіп" қағидаты аясында есірткі қылмысына қарсы іс-қимылды жалғастыра беретінін атап өтті.