Дональд Трамп Камбоджа мен Таиланд арасындағы қарулы қақтығысты шешуге ниет білдірді. Ақ үй басшысы жақын арада екі елдің басшыларымен телефон арқылы сөйлесетінін айтты.
Екі елдің арақатынасы осы аптада күрт нашарлап кетті. Таиланд көрші мемлекетті атысты тоқтату режимін бұзып, шекарада әскери белсенділікті арттырды деп айыптады. Алайда Камбоджа бұл мәлімдемелерді жоққа шығарды. Осыдан кейін тараптар бір-біріне қарулы соққы жасауды бастады.
Кейінгі мәліметтерге қарағанда Камбоджада 10 бейбіт тұрғын, ал Таиландта сегіз сарбаз қаза тапты. Шекара маңындағы аудандарда жүздеген мың адам эвакуацияланды. 26 қазанда екі елдің басшылары АҚШ-тың арағайындығымен бейбіт келісімге қол қойған еді. Трамп қақтығыс қайта басталса, Вашингтон сауда келісімдерінен бас тартуы мүмкін екенін ескерткен болатын.
