Арқада қазір бұрынғыдай бұрқаған боран, үскірік аяз жоқ. Қардың өзі әредік қапалақтап жаууғанмен, көп ұзамай еріп кетеді.

Қыстың кешігуі, яғни қар түспеуі енді диқандарды алаңдатып отыр. Өйткені ылғал азда, тоң болмайды. Ал тоң болмаса егіннің шығуы қиын. Арқада әдетте қыс маусымы жазға қарағанда ұзағырақ болады. Бірақ биыл бәрі өзгеше. Қыстың келгеніне апта өтсе де қар түскен жоқ. Тәжірибелі шаруа Өренхан Мамықов жылда осы уақытта қар тоқтату жұмыстарын жүргізетін. Бірақ биыл техниканың бәрі қаңтарылып тұр. Өйткені алқапта қар жоқ.

Өренхан Мамықов, шаруа:

- Біріншіден, ылғал орташа. Екіншіден, қыс енді басталды. Әлі көктем бар. Енді болашақта көреміз. Біз дайынбыз. Қарды тоқтатуға, ылғалды сақтауға техникалар дайын.

Ғалымдардың сөзінше, алқаптардағы ылғалдың аздығына климаттың өзгеруі себеп. Жаһандық жылынудың салдары қуаншылыққа әкелуі мүмкін. «Жалпы табиғаттың мұндай құбылысы тек біздің елде ғана емес, бүкіл әлемде байқалады», — дейді мамандар.

Әбілжан Құсайынов, ҚР Ауыл шаруашылығы академиясының академигі:

- Қазіргі жағдайда жаһандық климаттық процесі жүріп жатыр. Соның салдарынан ылғал буланып, топырақ, жер құрғай береді. Былайша айтқанда, шөлдену процесі жүріп жатыр. Қазақстан бойынша жыл сайын 500 мың гектар жер шөлденіп, жыл сайын оның көлемі көбейе береді.

Ал синоптиктер биылғы қыстың құбылмалы болатынын айтады. Яғни бірде аяз көтерілсе, кей күндері жылы болады деп болжап отыр.

Гүлжан Баймұқанова, «Қазгидромет» РМК филиалының инженері:

- Жалпы биылғы қыс мезгілі жылы болады. Бірақ жауын-шашын мен қатты жел болуы мүмкін. Тіпті желтоқсан айының соңында аяз күшеюі де ықтимал. Мұндай құбылмалы ауа-райы біздің өңірге тән құбылыс.

Осылайша, қардың нақты қашан жауатынын жауапты мамандар да дөп басып айта алмайды. Техникасын майлап, жұмысқа сайлап қойған шаруалардың әзірге күтуден басқа амалы жоқ.

Авторлары: Абзал Азаматұлы, Виктор Полянный