Мәртебе үкімет басшысы Олжас Бектенов қол қойған қаулымен бекітілді.

Жетісу облысындағы Бикен Римова атындағы драма театрына академиялық мәртебе берілді, деп хабарлады Жетісу облысы әкімінің баспасөз қызметі. Бұл мәртебе премьер-министрдің қаулысы негізінде беріліп отыр.

Еске салайық, бұл ұсынысты биыл 21 мамырда Мәдениет саласы қызметкерлерінің күніне арналған салтанатты жиында Мемлекет басшысы Қасым-Жомарт Тоқаев айтқан болатын.

"Талдықорған театрының құрылғанына биыл 50 жыл толды. Жарты ғасырлық белесте театр өз репертуарын байытып, қаншама жас таланттарды тәрбиелеп шығарды. Әрбір премьера, гастроль, көрерменнің қошеметі – біздің ортақ тарихымыздың алтын парақтары. Бүгін, міне, театрымыз академиялық мәртебе алып отыр. Бұл тек атақ қана емес, біздің өнерді өркендетуге қосқан үлесіміздің және ұлт руханиятын дамытудағы еңбегіміздің лайықты бағалануы деп білеміз", – деді Бикен Римова атындағы драма театрының көркемдік жетекшісі Сағындық Жұмаділ.

Талдықорған театрының негізі 1975 жылы қаланған, биыл 50 жылдығы аталып өтілді. Өнер ұжымы театр шымылдығын алғаш рет Ғабит Мүсіреповтің "Қозы Көрпеш – Баян сұлу" пьесасымен ашқан болатын. Бүгінде театрда Алмахан Кенжебекова, Әлихан Ыдырышева, Лидия Каденова, Дулыға Ақмолда секілді Қазақстанның халық артистері бар. Театрда жалпы 145 адам еңбек етеді, соның 61-і жастар, ұжымдағы қызметшілердің 72-сі – шығармашылық адамы.

Жетісу облысы құрылғаннан бері Жетісуда "BIKEN FEST" халықаралық фестивалі тұрақты өткізіліп келеді. Мәселен, биыл оған Қырғыз Республикасы, Өзбекстан, Әзербайжан, Грузия және басқа да елдерден 9 театр қатысты.

Оқи отырыңыз:

• Гогольдің "Ревизоры" енді Ғабит Мүсірепов театрының сахнасында қойылады
• Қуыршақ театры алғаш рет "Менің атым – Қожа" қойылымын сахналайды