Өткен аптада болған оқиға бейнебақылау камерасына жазылған.

Ақтөбеде бесінші сыныптың оқушысын соққыға жығып, қолын сындырған жеткіншекке қылмыстық іс қозғалды, деп хабарлады 31 арнаның Информбюро ақпараттық бағдарламасы.

Өзінен бес жас үлкен баладан таяқ жеген Айсұлтан Кәрімнің анасы мектепте тексеріс жүргізілсін деп отыр. Себебі, жоғары сыныптың ұлдары кішкентайларға күш көрсетуді әдетке айналдырды дейді. Бұл оқиғаға өзгелерге сабақ болсын деген әйел тергеудің әділ жүріп жатқанына да күдікпен қарайды.

Өткен аптада болған оқиға бейнебақылау камерасына жазылған. Видеодан бірнеше ұлдың доп теуіп жүрген балаларды алаңнан қуып жүргенін көруге болады. Сол сәтте бесінші сыныптың оқушысы үлкендерден оңбай таяқ жеген. Айсұлтанды жоғары сыныптың оқушысы дәл осы футбол алаңында тепкінің астына алған. Қатты соққыдан жеткіншек орнынан тұра алмай, бір сағаттай жерде жатыпты. Бет-аузы көгеріп, қолы сынып келген ұлын көргенде анасы шошып кеттім деп отыр.

Ақжан Кәрім ауруханада жатқан баламның мектепке барғысы келмейді дейді. Себебі, білім ошағында әлімжеттік тыйылмай тұр. Жоғары сыныптың балалары кішкентайларды қорқытып, білгенін істейді деп отыр. Шыр-пыр болған әйел балама қол көтерген оқушы тиісті жазасын алсын және өзгелерге сабақ болсын дейді. Ол ұстаздардың сотқар балаға шаң жуытпай отырғаны түсініксіз деп күйінеді.

Ал полиция қылмыстық іс қозғап, тергеуді бастады. Оныншы сыныптың оқушысы мектепішілік есепке қойылып, инспекторлардың бақылауына алынған. Оның ата-анасы да жауапкершілікке тартылмақ.

"Кәмелетке толмағанға орташа ауырлық дене жарақатын салу фактісі бойынша қылмыстық іс қозғалып тергелуде. Сотқа дейінгі тергеу барысында оқиғаның барлық мән-жайы анықталуда және осыған қатысты бар тұлғаларды анықтау бойынша шаралар қабылдануда", – деді Ақтөбе облысы полиция департаменті баспасөз қызметінің жетекшісі Ерболат Сарқұлов.

Айсұлтанның қолына ота жасалып, он бес күн ауруханада жатқан. Қазір жеткіншек үйден онлайн білім алып жүр. Дәрігерлер науқасқа әлі де ем қабылдауы керек депті.