Созақ ауданы полиция бөлімінің жедел уәкілі 200 мың теңге көлемінде пара алғаннан кейін ұсталды, деп хабарлайды Egemen.kz.

«Письма президенту» Telegram-арнасының мәліметінше, ол қашуға әрекет жасаған.

«Тінту кезінде 190 мың теңге табылып, тәркіленді. Күдікті тіркелмеген тегіс ұңғылы аңшы мылтығын тәркілеу фактісі бойынша қылмыстық жауапкершілікке тартпау үшін ақша талап еткен», делінген хабарламада.

Түркістан облысы полиция департаментінің түсініктемесінде, бұл фактіні департаменттің өзіндік қауіпсіздік басқармасы ҰҚК департаментімен бірлесіп анықтағанын мәлім етті.

«Қазір күдікті уақытша ұстау изоляторына қамалды. Оқиғаның барлық мән-жайын анықтау үшін сотқа дейінгі тергеу жүріп жатыр. Дисциплинарлық комиссияның шешімімен аталған қызметкер ішкі істер органдарынан теріс себеппен жұмыстан шығарылды. Сонымен қатар басқа жауапты тұлғаларға қатысты қызметтік тексеріс жүргізіліп жатыр», делінген хабарламада.

Полиция департаменті өз қатарын адал емес қызметкерлерден тазарту, қызметтік тәртіпті күшейту және заңдылықты қатаң сақтау бағытындағы жұмыстар жүйелі түрде жалғасып жатқанын атап өтті.