Ертең елордада «Астана халықаралық форумы» басталады, деп хабарлайды 24KZ. Үш күнге созылатын шараның бұл жолғы тақырыбы ғаламдық деңгейдегі мәселелерге – ынтымақтастық пен жаңа идеялар арқылы бірлесе жауап табуға арналады. Форумға 4 мыңнан астам қонақ қатысады. Оның ішінде Еуропа, Орталық Азия, Таяу Шығыс пен Африка елдерінен келген мың жарым шетелдік делегат бар. Алқалы жиында жаһандық қауіпсіздік, климаттың өзгеруі, энергетика, экономика және сыртқы саясат мәселелері ортаға салынбақ.

Жаһандық сын-қатерлер жағдайында мемлекетаралық ынтымақтастықты арттыруды көздейтін форум биыл да жалғасын таппақ. Ғаламдық мәселелерді қаузайтын шараға бұл жолы Руанда, Хорватия, Катар сынды 5 мемлекеттің басшылары қатысады. Шымылдығын Президент Қасым-Жомарт Тоқаев түреді.

Серік Жұманғарин, ҚР Премьер-министрінің орынбасары — ҚР Ұлттық экономика министрі:

- Форум бағдарламасы сыртқы саясат және халықаралық қауіпсіздік, энергетика және климаттың өзгеруі, экономика және қаржы сынды үш негізгі тақырыпты қамтиды. Бұл тақырыптар 40-тан астам панельдік сессияда талқыланады. Онда әлемдік көшбасшылар, сарапшылар мен бизнес өкілдері өз идеялары мен шешімдерін ортаға салады.

Форумда Мюнхен қауіпсіздік конференциясының төрағасы Хойсген геосаяси тепе-теңдік саласындағы сарапшы ретінде жаңа әлемдік тәртіпті қалыптастыру мәселесін көтерсе, Дүниежүзілік банктің Еуропа және Орталық Азия бойынша вице-президенті Антонелла Бассани әлемдік экономикадағы басты сын-қатерлер туралы пікірін білдірмек. Ал БҰҰ-ның бұрынғы Бас хатшысы Пан Ги Мун жиында алғаш рет сөз сөйлейді.

Пан Ги Мун, БҰҰ 8-ші Бас хатшысы, GGGI президенті және төрағасы:

- Мен пленарлық сессияда сөз сөйлеймін. Сондай-ақ аймақтық байланыстарды нығайтуға және оларды өркендетуге негізделген сессияға қатысамын. Астана халықаралық форумы жыл сайын билік өкілдерінің, халықаралық ұйым мен бизнес көшбасшыларының басын біріктіріп, тың идея алмасып, маңызды шешімдер қабылданатын басты іскерлік алаңға айналды. Сондықтан Орталық Азияның мүмкіндіктерін ашатын форумға қатысуға шақырамын.

Мадияр Сұлтанбек, «Kazakh Invest» ұлттық компаниясы басқарушы төрағасының орынбасары:

- Орталық Азия елдерінің Африка мемлекеттерімен байланысын нығайтуға негізделген панельдік сессия да өткізіледі. Руанда президенті, Нигерия королі келеді деп күтіліп отыр. Бұл бізге сауда жолдарын диверсификациялауға және осы елдерден алдағы уақытта инвестиция тартуға да өте жақсы мүмкіндік береді. Сондықтан бұл форум еліміздің имиджін дамытуда үлкен септігін тигізеді.

Іскерлік жиын барысынан ақпарат таратуға бас қалаға 60-тан астам бұқаралық ақпарат құралының 100-ден астам журналисі де келген.

Ханака Монтгомери, CNN телеарнасының халықаралық тілшісі:

- Мен Астана халықаралық форумын тағатсыздана күтіп отырмын. Мен екі панельдік сессия модераторы боламын. Бірі санкция және сауда шектеулері сынды экономикалық құралдардың геосаяси билікте жиі қолданылуы туралы болса, екіншісі Орта дәліз сынды сауда жолдарының әлемдік сауданы өзгертуі жайлы болады. Сондықтан сіздермен қауышуды асыға күтемін.

Ұйымдастырушылардың айтуынша, форумға қатысушылар қаланың 40-қа жуық ірі қонақ үйлерінде тұрақтаған. Былтырғы көрсеткішпен салыстырғанда қонақ үйлердің толуы шамамен 30% артқан. Яғни тек шетелдік меймандардың келуі есебінен елімізге 2,5 миллиард теңгеден астам қаражат түседі. Бұл ел экономикасының әлеуетін арттыруда елеулі рөл атқарады.

Авторлары: Назым Қайрат, Жандос Битабаров