Хабар-ошарсыз кеткендер де бар.

Филиппинде "Калмаеги" тайфуны салдарынан кемінде 140 адам қаза тапты. Тағы 127 адам із-түссіз жоғалып кеткен, деп хабарлайды inbusiness.kz сайты DW агенттігіне сілтеме жасап.

Табиғат апаттан зардап шеккен аудандарды бақылап жүрген әскери тікұшақ апатқа ұшырап, бортта болған 6 адам қаза тапты. 430 мыңнан астам адам үйлерін тастап кетуге мәжбүр болған.

Лусон, Висаяс және Минданао аймақтарындағы 24 провинция зардап шекті. Көптеген ауданда жарық сөніп, ондаған әуе рейстері тоқтатылды.

Елдің метеорологиялық қызметінің хабарлауынша, дауылдың күші бәсеңдегенімен, жел екпіні сағатына 180 километрге дейін жетіп отыр. Көптеген елдімекендерде көшелер толықтай су астында қалған. Тұрғындар апаттан қорғану үшін үйлердің шатырларына шығуға мәжбүр болған.

Синоптиктердің дерегінше, "Калмаеги" тайфуны жеті рет құрлық бетіне шыққан. Метеорологтар Филиппинге жаңа тропикалық циклонның жақындап келе жатқанын мәлімдеді. Ол жұма немесе сенбі күні құрлыққа жетіп, демалыс күндері қуатты дауылға ұласуы мүмкін.

Айта кету керек, бұған дейін Қасым-Жомарт Тоқаев "Калмаэги" тайфунының салдарынан көптеген адамның қаза табуына байланысты Филиппин Президенті Фердинанд Маркосқа көңіл айтқанын жазғанбыз.