Оған 3 мамыр күні жауған нөсер жауын себеп болған.

Бұл туралы фото және видеолар көрші елдің әлеуметтік желілерінде кеңінен тарады, деп хабарлайды inbusiness.kz сайты.

Кадрлардан жаңбыр суының Балалар онкологиясы, гематологиясы және иммунологиясы ғылыми-практикалық медициналық орталығының ғимаратына кіргенін көру қиын емес.

Сондай-ақ, Ташкенттің кейбір көшесі, тұрғын үйлердің аулалары және бірқатар нысанды су басқан.

Өзбекстан Төтенше жағдайлар министрлігі мәліметінше, оқиға орнына Чиланзар ауданы төтенше жағдайлар бөлімінің басшысы барған. Құтқарушылар мен орталық қызметкерлері бірлесіп, нөсер салдарын жою жұмыстарын жүргізді.

Су тасқыны "Чорсу" метро станциясы ішіне де кірген. Мұндай жағдай бұған дейін де бірнеше рет тіркелген еді.

Метрополитен әкімшілігі оқиғаға ирригациялық және дренаж жүйелерінің уақытылы тазаланбауы себеп болғанын айтады. Соның салдарынан жүйелерге түсетін жүктеме артқан.

– Метрополитен нысандары тұрақты түрде техникалық бақылаудан өтеді. Бұған дейін төтенше жағдайлардың алдын алу мәселелері бойынша жауапты ұйымдар мен қала әкімдігіне бірнеше рет ресми хаттар жолданған, – делінген хабарламада.

Құтқарушылардың сөзінше, судың басым бөлігі ирригациялық-дренаж жүйесі арқылы табиғи түрде ағып кеткен. Сонымен қатар, судың жиналуына жол бермеу үшін Ташкент қалалық төтенше жағдайлар қызметінің арнайы бөлімшелері жұмылдырылды.

Кейін метрополитен өкілдері станция аумағына судың кіруі толық тоқтатылғанын хабарлады. Қазіргі уақытта пойыздар штаттық режимде қатынап жатыр.