Нартай Сәрсенғалиев адамдардың ар-намысына тиетін контент авторларының желдегі парақшаларын бұғаттауды ұсынды.

Мәжіліс депутаты Нартай Сәрсенғалиев парықсыз пранк түсіріп, оны әлеуметтік желіге салу арқылы әлек салып жүрген блогерлерді жауапқа тартуды ұсынып, мәдениет және ішкі істер министрліктерінің басшыларына сауал жолдады.

Депутаттың айтуынша, қоғамда пранкпен парақшасындағы лүпілдің санын арттырғанымен парасат биігінен омақаса құлағандар қаптап кеткен. Бұл ретте Нартай Сәрсенғалиев лифтке адамды мәйітке ұқсатып кіргізіп өзгелерді қорқытқан, аула сыпырушыларға қоқым лақтырып мазақ еткен және басқа да видеоларды мысалға келтірді.

"Біздің блогерсымақтар шетелге барып абыройды айрандай төгіп жүр. Мәселен, қазақстандық блогер Аружан Айбекова Қытайда "ұрлық жасап жатқандай" ролик түсірген. Арты үлкен шу болып, ақыры әлгі қыз жергілікті полицияға шақырылды. Түсіндіру жұмыстары жүргізілді. Бірақ ол түсінді ме? Өйткені дәл осы блогердің арада аз уақыт өткенде Ташкент метросында жігіттердің қолынан ұстап тиіскені туралы бейнежазба тағы тарады. "Ойыннан да омыртқа сынатынын" білмейтін мұндай блогер-сымақтарды қатаң жауапқа тартатын кез келді", – деді мәжіліс депутаты.

Оның сын садағынан жасанды интеллектінің көмегімен жасалатын дипфейк видеолар да тыс қалмады. Депутат Маркетинг үшін деп жасанды интелект арқылы мұндай жасандылыққа жүгінуді тоқтату керектігін айтты.

Қорыта келгенде Нартай Сәрсенғалиев пранк барысында қоғамдық тәртіпті бұзған, жеке адамның өміріне қол сұққандарды анықтап, олардың бірыңғай тізімін жасап жариялауды, қауіпті пранк арқылы адамның ар-намысы мен абыройына қол сұққандардың әлеуметтік желідегі парақшаларын бұғаттауды, сондай-ақ, әлеуметтік желі әкімшілерінен қауіпті пранктер мен бейнежазба жарияланған парақшаларды анықтап, уәкілетті органға жедел хабарлауды талап етуді сұрады.

Оқи отырыңыз:

• Әлеуметтік желіні бұғаттау қалай мемлекеттік төңкеріске әкелді? Непалда не болып жатыр
• "Әлеуметтік желі керек, бірақ 3-5 жасар балаға TikTok қосып беру зиян". Асхат Аймағамбетов цифрлық әлемді реттеу туралы