Жансель Дениз 2016 жылы Рио-де-Жанейродағы (Бразилия) және 2020 жылы Токиодағы (Жапония) Олимпияда ойындарына қатысқан.

Таеквондодан Қазақстан құрамасының ең тәжірибелі өкілдерінің бірі Жансель Дениз елден кетіп, енді мансабын басқа командада жалғастырады. "1Бол" ақпаратынша, Дениз Сингапур құрамасына бапкер ретінде ауысты. Кейбір деректерге қарағанда, ол команданың бас бапкері қызметін атқаруы мүмкін.

Айта кетейік, Жансель Дениз ресми түрде спорттық мансабын аяқтады. Оның жаңа қызметтегі алғашқы жарысы бүгін, 24 қазанда Қытайдың Уси қаласында басталған 2025 жылғы әлем чемпионаты болуы ықтимал.

Жансель Дениз 1991 жылдың 26 тамызында Ақмола облысының Степногорск қаласында дүниеге келген. Бала кезінде ол Түркияға қоныс аударып, сол елдің азаматтығын алған. Алайда кейін Қазақстанға оралған. Ұлттық құраманың сапында ол +67 кг (OR) және −73 кг (WR) салмақ дәрежелерінде өнер көрсетті.

Қазақстан құрамасының сапында Жансель Дениз 2017 жылғы Универсиаданың, 2018 жылғы Азия ойындарының, 2021 және 2022 жылдардағы Азия чемпионаттарының, 2022 жылғы клубтық Азия чемпионатының күміс жүлдегері, сондай-ақ 2023 жылғы Азия ойындарының қола жүлдегері атанды.