Шымкентте 16 жасқа дейінгі қыздар арасындағы командалық әлем чемпионатының аймақтық іріктеу кезеңі – Junior Billie Jean King Cup (Азия/Мұхит жағалауы аймағы) мәресіне жетті, деп жазады inbusiness.kz сайты.

Жарыстың соңғы күнінде Қазақстан құрамасы Үндістан командасымен кездесіп, шиеленісті матчта жеңіске жетіп, жалпы есепте 7-орынға ие болды.

7-орын үшін өткен бәсеке тартысты өрбіді. Алғашқы жекелей ойында Тамина Сәкен Анандита Упадхайды айқын басымдықпен жеңді – 6:2, 6:2. Ал екінші кездесуде Каролина Лигай Дженси Дипакбхай Канабарға жол берді – 2:6, 2:6.

Жеңімпаз тағдыры жұптық ойында анықталды. Мариям Нұржан мен Тамина Сәкен жұбы Үндістан өкілдері Дипакбхай Канабар / Упадхай дуэтімен кездесті. Бірінші сетте қарсыластарына есе жіберген қазақстандықтар (3:6), екінші партияда ойын қарқынын күшейтіп, есепті теңестірді (6:4). Ал шешуші супер-тайбрейкте басым түсіп, 10:6 есебімен жеңісті қамтамасыз етті.