Республика күнін мерекелеу қарсаңында Қостанай облысының Тобыл қаласында он көпқабатты үй пайдалануға берілді .

Мемлекеттің қолдауымен салынған бұл баспаналар «Астана» атты жаңа тұрғын ауданында орналасқан. Жалпы мұнда 150-ден астам үй болады. Тұрғын үйдің басым бөлігі кезекте тұрғандарға үлестіріледі.

«Астана» шағын ауданында тұрғын үй құрылысы бір жыл бұрын басталған еді. Жоба бойынша Тобыл қаласында 154 көпқабатты үй салынады. Бұл миллион шаршы метрден астам тұрғын үй. Алғашқы 450 пәтер дайын күйде бүгін пайдалануға берілді.

Нұрбек Темірбек, Құрылыс компаниясы директорының орынбасары:

- Жуынатын бөлме ішіндегі қажеттінің бәрі бар. Ас бөлмеде газ плитасы, ыдыс жуатын жабдықтар орнатылған, электр сымдары тартылған.Бұл мемлекеттік нысан саналады. Бізге жобасы ұсыналады. Соған сәйкес құрылыс жүргізіп, қажеттің бәрін орнатып береміз.

Салынып жатқан шағын аудандағы пәтерлер жергілікті атқарушы органдарда баспана кезегінде тұрған облыс тұрғындары арасында белгіленген бағамен үлестіріледі. Өңірде 28 мың адам тұрғын үй кезегінде тұр. Халықтың әлеуметтік әлжуас топтарына басымдық беріледі.

Құмар Ақсақалов, Қостанай облысының әкімі:

- Облысымызда жыл басынан бері 391 мың шаршы метр пайдалануға берілді. Ол шамамен 4145 пәтер бүгінгі күні. Осы жылдың аяғына дейін тағы да жалпы 500 мың шаршы метр беріледі негізінде. 500 мың шаршы метр ол 6,5 мың пәтер. Сондықтан облыс тұрғындары, қостанайлықтар осы жылдың аяғына қарай 6,5 мың отбасы өзінің қоныс тойын тойлайтын болады.

Пәтер құнына келсек, бір шаршы метрі 254 мың теңге деп белгіленген. Дегенмен құрылыс саласының сарапшылары бюджеттік үйлердің сапасын жоғары бағалап отыр.

Ирина Викулова, Қостанай облысы Құрылысшылар қауымдастығының атқарушы директоры:

- Бұл Бюджеттік тұрғын үй болса да, сапалы салынып, жақсы әрленген. Егер нарықтағы орташа бағамен салыстырсақ және статистикалық мәліметтерге жүгінсек — мына үйлердің құны 1 шаршы метр үшін шамамен 420 мен 500 мың теңге аралығында бағаланар еді.

«Астана» шағын ауданының алғашқы тұрғындары жыл соңына дейін қоныстанады деп күтілуде. Тапсыруға дайын он үй жылуға, электр және су сорғы станциясына қосылған. Жоба бойынша алдағы жылдары мұнда екі мектеп, спорт сарайы мен аурухана салынады.

Авторлары: Достық Талғатұлы, Ермек Мухамедьяров