Жобаның мақсаты – қоршаған ортаға зиян келтірмей, таза әрі қауіпсіз көлік түрін жасау.

Абай облысы Аягөз қаласында К.Бозтаев атындағы қазақ мектеп-гимназиясының 9 және 10-сынып оқушылары Ерсұлтан Жаркенаев пен Нұрдәулет Саулебеков баламалы энергия көздерімен жүретін ерекше су пойызын жасап шықты, деп хабарлайды inbusiness.kz сайты.

Абай облысы әкімдігінің мәліметінше, оқушылар ойлап тапқан бұл пойыз мотордың көмегімен қозғалады. Арнайы айналмалы қалақшалар суды итеріп, пойызды алға жылжытады. Қуат көзі ретінде күн сәулесі мен өзен ағысы пайдаланылады. Жобаның басты артықшылығы – экологиялық таза әрі отын шығыны жоқ. Бұл – болашақ көлігі.

Су пойызы үш бөліктен тұрады: басқару кабинасы, жолаушылар бөлімі және жүк тасымалдау вагоны. Жолаушылар бөлігінде балаларға арналған ойын алаңы, шахмат пен танымдық демалыс аймағы және шағын спорт орны бар. Ал соңғы бөлік шалғай ауылдарға жүк, кітапхана, концерттік жабдықтар сияқты қажетті заттарды жеткізуге арналған.

Жобаның мақсаты – қоршаған ортаға зиян келтірмей, таза әрі қауіпсіз көлік түрін жасау. Сонымен бірге, бұл пойыз туризмді, ауыл мен қала арасындағы байланысты, көшпелі мәдени қызметтерді дамытуға мүмкіндік береді.

"Біз бұл пойызды жай байқауға қатысу үшін емес, расымен іске жарайтын көлік ретінде жасадық. Ол табиғатты сақтап, ауылдарға көмектесе алады. Болашақта мұндай көлік көп болса екен дейміз", – дейді оқушылар.

Айта кетейік, бұл жоба аймақтық "Ұлы өнертапқыштыққа алғашқы қадам" байқауында үздік деп танылып, тың идеясы мен экологиялық маңыздылығы үшін жоғары баға алды. Жас өнертапқыштар болашақта құрылғының нақты прототипін жасап шығаруды көздеп отыр. Олардың арманы – су көлігін Аягөз өзенінде ғана емес, Қазақстанның басқа өзен-көлдерінде де қолдану.