Интернет мәселесі Алакөл, Балқаш , Қапшағай, Бұқтырма сияқты туристік бағыттарда өзекті болып отыр.

Парламент мәжілісінің депутаты Екатерина Смолякова Қазақстанның туристік өңірлерінде интернеттің жоқтығы ел экономикасы мен имиджі үшін кедергіге айналып отырғанын айтты. Ол тұрақты байланыспен қамтамасыз етуді және шалғай аймақтарда Starlink сияқты спутниктік шешімдерді пайдалануды қарастыруды ұсынды.

Депутаттың сөзінше, еліміздің көптеген танымал туристік аймақтарында әлі күнге дейін тұрақты интернет пен байланыс жоқ. Демалушылар такси шақыра алмайды, онлайн билет сатып ала алмайды, тіпті төтенше қызметке де хабарласа алмайды. Екатерина Смолякова премьер-министр Олжас Бектеновке депутаттық сауал жолдап, өңірлердегі цифрлық артта қалушылық ел экономикасына және имиджіне кері әсер етіп жатқанын атап өтті.

"Бүгінде интернет – сән емес, күнделікті қажет инфрақұрылым. Онсыз қауіпсіздік те, онлайн қызметтер де, кәсіпкерлік те дамымайды. Ал туристік аймақтарда адамдар қоңырау шала алмай, төлем де жасай алмай отыр", – деді депутат.

Оқи отырыңыз: Қазақстанда Starlink интернеті қанша тұрады және оған қалай қосылуға болады? Шағын нұсқаулық

Смолякова атап өткендей, интернет мәселесі әсіресе Алакөл, Балқаш, Қапшағай, Бұқтырма сияқты туристік бағыттарда өзекті болып отыр. Себебі байланыс сапасы демалушылардың жайлылығына тікелей әсер етеді.

"Қазақстан ішкі туризмді дамытқысы келсе, цифрлық инфрақұрылым соған сай болуы керек. Турист 21-ғасырда жүргенін сезінуге тиіс, ал біз әлі "сигнал ұстайтын жер" іздеп жүрміз. Интернет жол, жарық пен сумен қатар тұратын маңызды дүние болуы керек. Онсыз біз цифрлық теңсіздікті жоя да, өңірлік экономиканы дамыта да алмаймыз", – деді ол.

Депутат "Қолжетімді интернет" бағдарламасы аясында қамтылатын 1 123 ауылдың ішінде ең алдымен туристік өңірлерге тұрақты байланыс орнатуды және алыс аймақтарда Starlink сияқты спутниктік шешімдерді пайдалануды ұсынды.